Jahandyq turaqsyzdyq beleń alǵan shaqta túrki memleketteriniń yntymaǵyn nyǵaıtý qajet - Erdoǵan
«Sizdiń búgingi memlekettik saparyńyz eki eldiń yntymaqtastyǵyna úlken serpin beredi dep oılaımyn. Biz Túrkııamen teń dárejedegi yntymaqtastyqty odan ári nyǵaıtýǵa basa men beremiz. Bul meniń erekshe nazarymda. Kezdesýimizdiń kún tártibindegi birqatar máseleler boıynsha pikir almasyp, ýaǵdalastyqqa qol jetkizemiz dep oılaımyn», – dedi Memleket basshysy.
Túrkııa Prezıdenti Rejep Taııp Erdoǵan Qasym-Jomart Toqaevqa mamyr aıynda Túrkııaǵa memlekettik sapary men Nıý-Iorktegi ekijaqty kezdesýden keıin qaıtadan júzdesip otyrǵanyna qýanyshty ekenin atap ótip, qonaqjaılyǵy úshin alǵys aıtty.
«Búgin Joǵary deńgeıdegi strategııalyq yntymaqtastyq keńesiniń 4-otyrysyn ótkizemiz. Sondaı-aq erteń Azııadaǵy ózara is-qımyl jáne senim sharalary keńesiniń sammıtine qatysamyz. Sizdiń kóshbasshylyǵyńyzben júrgizilgen reformalar qazaq halqynyń tynyshtyǵyn saqtap, ál-aýqatyn jaqsartatynyna senimim mol. 20 qarasha kúni bolatyn Prezıdent saılaýy ádil ári jańa Qazaqstan úshin qaıyrly bolýyn jáne sizge sol saılaýda sáttilik tileımin», – dedi Rejep Taııp Erdoǵan.
Túrkııa Prezıdenti jahandyq jáne aımaqtyq turaqsyzdyq beleń alǵan shaqta túrki memleketteriniń yntymaǵyn odan ári nyǵaıtý qajet ekenin, sondyqtan strategııalyq seriktes ári baýyrlas el Qazaqstannyń qaýipsizdigine, turaqtylyǵyna, terrıtorııalyq tutastyǵyna jáne ekonomıkalyq ál-aýqatynyń jaqsarýyna aıryqsha mán beretinin jetkizdi.
«Túrkııaǵa memlekettik saparyńyz barysynda qol qoıylǵan 14 yntymaqtastyq týraly qujat pen ortaq deklaratsııa qarym-qatynasymyzǵa tyń serpin berdi. Búgin osy kelisimderge qosymsha jańa qujattar qosylady. Atajurtyma kelgen maǵan jáne meniń delegatsııama qonaqjaılyq kórsetkenińiz úshin taǵy da alǵys aıtamyn«, – dedi Rejep Taııp Erdoǵan.
