Jahandyq sammıttegi N. Nazarbaevtyń usynystary Qazaqstanǵa da asa zor jaýapkershilikter júkteıdi

Búgin QR Parlamenti Májilisinde «Qazaqstan-beıbitshilik eli» atty taqyrypta ótken dóńgelek ústel barysynda Májilis Tóraǵasynyń orynbasary Jánibek Káribjanov osylaı málim etti, dep habarlaıdy QazAqparat.

«Jaqynda ǵana Vashıngton qalasynda ótken ıadrolyq qaýipsizdik jónindegi jahandyq sammıtte sóılegen sózinde Elbasy N. Nazarbaev ıadrolyq qarýdyń alapat qýatynan barynsha zardap tartqan el retinde Qazaqstannyń jer betinde qaýipsizdik pen tatýlyqty ornatýdy jaqtaıtynyn málimdedi. Sonymen birge, bundaı qadamdy damyta túsý úshin birneshe naqty usynystar aıtty. Bulardyń qatarynda ıadrolyq qarýsyz álemniń jalpyǵa ortaq deklaratsııasyn qabyldaý máselesi de bar. Bul halyqaralyq qaýipsizdiktiń jańa júıesin qurý jolyndaǵy asa mańyzdy usynys», dedi J. Káribjanov.

Sonymen birge, vıtse-spıker jahandyq sammıt barysynda AQSh Prezıdenti B. Obamanyń qazaqstandyq ustanymdy joǵary baǵalaǵanyn ári Qazaqstan ıadrolyq qarýdy taratpaý jónindegi AQSh-tyń eń senimdi strategııalyq áriptesi bolyp otyrǵanyn jetkizdi.

«Jalpy, Elbasynyń jahandyq sammıtte kótergen usynystary qazirgi qalyptasqan jaǵdaıdy jaqsartý turǵysynan basshylyqqa alynatyn baǵyt retinde úlken halyqaralyq qoldaýǵa ıe boldy. Sonymen birge, bul usynystar Qazaqstanǵa da asa zor jaýapkershilik júkteıdi. Qazaqstan osy usynystardyń bastamashysy retinde olardy barynsha ilgeriletýge kúsh salýy kerek. Bul baǵytta Parlament depýtattary da belsene atsalysýǵa tıis», dedi J. Káribjanov.