Jahandyq málimetter bazasy arqyly álemdegi bosqyndar men mıgranttardyń qozǵalysy baqylanady
ASTANA. QazAqparat - Germanııa jáne Halyqaralyq kóshi-qon uıymy keń aýqymda derekkózderdi qoldana otyryp, álemdegi bosqyndar men mıgranttardyń qozǵalysyn baqylaýǵa múmkindik beretin jahandyq málimetter bazasyn qurady. Halyqaralyq kóshi-qon uıymynyń habarlaýynsha, málimetter bazasy arnaıy portalda qoljetimdi bolady, dep habarlaıdy TASS.
«Biz álemdik qaýymdastyq sheńberinde aqparattarmen almasyp, kóshi-qondy rettep otyrýymyz kerek», - deıdi Germanııa syrtqy ister mınıstri Frank-Valter Shtaınmaıer.
Portaldyń ashylýy men jumys isteýin Germanııa qarjylandyrady. Ony halyqaralyq kóshi-qon uıymynyń quramyndaǵy kóshi-qon málimetterin taldaýdyń jahandyq ortalyǵy Berlındegi shtab-pátermen qamtamasyz etedi.
«Qazirgi qıyn-qystaý zamanda naqty faktiler men dál taldaý negizinde sheshim qabyldaýymyz kerek, - dedi halyqaralyq kóshi-qon uıymynyń bas dırektory Ýılıam Leısı Svıng. - Kóshi-qon týraly málimetter túrli uıymdar men túrli elder arasynda bytyrap jatyr. Túrli derekkózden barlyq málimetti jınaıtyn bul portal biregeı platformaǵa aınalǵaly tur.
Halyqaralyq kóshi-qon uıymynyń deregi boıynsha, ótken jyly álemdegi bosqyndar men kóship-qonýshylar sany rekordty 65,3 mıllıon adamǵa jetken.
