Jahandyq ınflıatsııa buǵan deıin boljanǵan ýaqyttan da uzaq bolady – Ulttyq bank
«Geosaıası táýekelderdiń iske asyrylýy, jahandyq taýar jetkizý joldary problemalarynyń shıelenisýi, azyq-túlik pen energııa resýrstary baǵasynyń ósýine baılanysty álemdegi syrtqy ınflıatsııalyq qysymnyń kúsheıýi, baǵamnyń álsireýi ınflıatsııanyń barynsha joǵary dınamıkasynyń basty sebebine aınalady. Ulttyq bank el ekonomıkasyna syrtqy shok saldarynyń taralýyn aldyn alý, teńgege qysymdy tómendetý jáne teńgedegi aktıvterdi qorǵaý is-sharalaryn qabyldaýda. Osy maqsattar úshin bıylǵy jylǵy 24 aqpanda Ulttyq bank bazalyq stavkany 13,5 paıyzǵa deıin kóterdi», - dedi Ǵalymjan Pirmatov.
Onyń atap ótýinshe, geosaıası ahýal nasharlap, syrtqy táýekelderdiń júzege asýy jaǵdaıynda ınflıatsııa boljamy joǵarylaý jaǵyna qaraı qaıta qaralýda. Inflıatsııanyń 2022-2023 jyldardaǵy nysanaly dálizden joǵary bolyp qalyptasý táýekeli de artyp otyr.
«Osy jylǵy aqpan aıynda jyldyq ınflıatsııa barlyq komponentteriniń qymbattaýy aıasynda 8,5-ten 8,7 paıyzǵa deıin jedeldedi. Inflıatsııaǵa azyq-túlik taýarlary úlken úles qosady. Olarǵa baǵanyń ósýi 10 paıyzǵa deıin nan-toqash ónimderiniń, jarmalardyń, sút ónimder men kókónisterdiń qymbattaýyna baılanysty jedeldedi», - dedi ol.
UB tóraǵasynyń aıtýynsha, azyq-túlikke jatpaıtyn ınflıatsııa 8,5-ten 8,6 paıyzǵa deıin ósti. Aqyly qyzmetter 6,8-den 7,1 paıyzǵa deıin jedeldedi. Bul birqatar naryqtyq qyzmetter baǵasynyń ósýine baılanysty.
«Energııa, metall jáne aýylsharýashylyq ónimderi baǵasynyń ósýine baılanysty jahandyq ınflıatsııa buǵan deıin boljanǵan ýaqyttan da uzaq merzim bolady jáne ishki baǵalarǵa qysym jasaıdy», - dedi Ulttyq bank basshysy.