Jahandyq daǵdarystyń teris áserinen qazaqstandyqtardy halyqtyq reformalardy júzege asyrý qorǵaıdy - Qazaqstannyń shyǵarmashylyq odaqtary
ASTANA. QazAqparat - Qazaqstannyń shyǵarmashylyq odaqtary Memleket basshysy Nursultan Nazarbaevtyń ulyqtaý rásiminen keıin Qazaqstan Respýblıkasy Prezıdentiniń qyzmetine resmı túrde kirisýimen quttyqtap, Elbasy usynǵan 5 ınstıtýtsıonaldyq reformaǵa óz qoldaýlaryn bildirdi.
Aıta keteıik, Qazaqstannyń shyǵarmashylyq odaqtary quramyna Qazaqstannyń kompozıtorlar odaǵy men Qazaqstan dızaınerleri odaǵy kiredi.
«Asa qurmetti Nursultan Ábishuly! Shyǵarmashylyq zııaly qaýym ókilderi Sizdi Qazaqstan Respýblıkasynyń Prezıdentiniń qyzmetine ulyqtaý rásiminen keıin resmı túrde kiriskenińizben quttyqtaıdy!
Siz atap ótken bes ınstıtýtsıonaldyq reformany júzege asyrý - eldiń qazirgi damý kezeńine ýaqytynda usynylǵan jáne mańyzdy úrdis dep esepteımiz. Sizdiń basshylyǵyńyzben elimiz qarqyndy damyp keledi, ár azamat memlekettiń qoldaýy men qamqorlyǵyn sezinedi.
Halyqtyq reformalardyń júzege asyrylýy qazaqstandyqtardy jahandyq daǵdarystyń memlekettik qurylymǵa tıgizýi múmkin teris áserinen qorǵaıdy dep senemiz. Bul sharalar Qazaqstannyń damý úrdisin saqtap, eń damyǵan 30 eldiń qataryna enýge septesedi», dep atap ótilgen quttyqtaýda.
Sondaı-aq shyǵarmashylyq zııaly orta qaýymynyń pikirinshe, jańa formattaǵy tıimdi memlekettik apparat, quqyq qorǵaý jáne sot júıesi merıtokratııa qaǵıdaty negizinde etnosyna qaramaı, ózin-ózi jetildirýge teń múmkindikter beriletin ádil qazaqstandyq qoǵamnyń túp-tamyryna aınalady.
«Siz usynǵan ındýstrııalandyrý reformasy ekonomıkanyń ártaraptanýyn qamtamasyz etedi. Agrarlyq sektor, shaǵyn jáne orta bıznes, eldiń eksporttyq áleýetiniń damýy alǵa jyljıdy. Rýhanı qundylyqtardy biriktiretin reformanyń da orny bólek. Jalpyulttyq ıdeıa qazaqstandyq halyqty biriktirdi, birigip biz kez-kelgen qıyndyqtardan jeńe alamyz!
Nursultan Ábishuly, Qazaqstannyń shyǵarmashylyq salasyndaǵy tulǵalary atynan qamqorlyǵyńyz úshin alǵys aıtyp, Sizdiń basshylyǵyńyzben elimiz órkendeı bersin degimiz keledi», dep túıindelgen quttyqtaý hatta.
