Jahandyq daǵdarystyń barshaǵa málim irgeli sebepteri áli de joıylǵan joq - Memleket basshysy
Búgin VI Astana ekonomıkalyq forýmy men Daǵdarysqa qarsy dúnıejúzilik konferentsııanyń saltanatty ashylýy barysynda sóz sóılegen QR Prezıdenti Nursultan Nazarbaev osylaı málim etti.
Sóz arasynda Elbasy «G-global» aıasynda pikirtalasqa shyǵarylǵan máseleler boıynsha kózqarasymen de bólisken bolatyn. Bul rette Prezıdent eń aldymen, daǵdarysqa qarsy mańyzdy, tujyrymdamaly ádisterge toqtaldy.
«Álem sońǵy jyldary óz basynan ótkergen jaıttardan sabaq alýlary kerek edi. Ózderińiz qarańyzdar, byltyrǵy jyldyń sońyna taman ǵana álem jurtshylyǵynyń basym bóligi derlik 21-ǵasyrdaǵy jahandanǵan jalpyálemdik daǵdarysty tarıhtyń jabylǵan paraǵy dep eseptegen bolatyn. Buǵan kóptegen qarjy ınstıtýttary da sendirmek boldy. Alaıda, eıforııa oryn almady. Kıprdegi qarjy júıesiniń qurdymǵa ketýi jalpyǵa ortaq ekonomıkalyq turaqtylyq dáýiriniń jaqyndap qalǵany týraly áńgimege senimsizdik týdyrýda», - dedi N. Nazarbaev.
Bul rette Prezıdent Kıpr ıntsıdentin jahandyq daǵdaryspen baılanystyrýdy joqqa shyǵaratyn baǵalaýlarmen tanys ekenin, alaıda faktiniń ózi bárin aıqyndap turǵanyn atap ótti.
Elbasynyń paıymynsha, tipti qarapaıym sarapshylardyń ózi Kıpr bankteriniń problemasy men budan bes jyl burynǵy amerıkalyq ıpotekalyq agenttikterdiń quldyrýy arasyndaǵy uqsastyqtardy atap bere alady.
«Bul, eń aldymen, qarjy kópirshikterin qoldan úlkeıtý, jeńil aqshaǵa degen ashkózdik jáne ulttyq qarjy ınstıtýttarynda tıisti jaýapkershiliktiń bolmaýy, jahandyq qarjy qurylymdarynyń álsizdigi. Jahandyq daǵdarystyń osy jáne basqa da irgeli sebepteri áli de joıylǵan emes», - dedi N. Nazarbaev.
