Jahandyq daǵdarysty eńserýde áıelder mańyzdy ról atqarady – Lázzat Ramazanova
Onlaın túrde uıymdastyrylǵan is-sharaǵa bıylǵy 25 naýryzda Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova qatysyp, baıandama jasady.
Lázzat Ramazanova baıandamasynda Qazaqstan BUU-nyń jaýapty múshesi retinde áıelderdiń qoǵamdyq-saıası ómirge belsendi atsalysýyna elde barynsha jaǵdaı jasalyp otyrǵanyn atap ótti. Qoǵamnyń barlyq salalaryndaǵy sheshim shyǵarý deńgeıinde áıelderdiń múmkindikterin arttyrý sharalary qabyldanǵanyn atady.
Dúnıejúzilik ekonomıkalyq forýmnyń málimetterine sáıkes, áıelderdiń ekonomıkaǵa at salysý deńgeıi jaǵynan 153 eldiń arasynda Qazaqstan 37 orynda. Bul elimizdegi jasalyp otyrǵan reformalar jáne qazaqstandyq áıelderdiń ekonomıkaǵa qosqan úlesiniń nátıjesinde qol jetkizip otyrǵan jetistik.
«Qazaqstandyq qyz-kelinshekter el ekonomıkasyn damytýǵa, daǵdarysty eńserýge jáne ekonomıkany qarqyndy ilgerletýge belsendi atsalysýda. Bul rette qyz-kelinshekterdiń qosyp otyrǵan úlesi zor. Elde áıelder kásipkerligi memleket tarapynan qoldanady. Qazirgi ýaqytta elimizdegi shaǵyn jáne orta bıznes sektoryndaǵy jumys oryndarynyń úshten birin áıelder qamtamasyz etip otyr. Ásirese qyz-kelinshekter sany jeke kásipkerlik, saýda jáne qarjy salalarynda basym. Osylaısha isker hanymdar osy salalardy damytýǵa yqpal etýde», - dedi Lázzat Ramazanova.
Ulttyq komıssııa tóraıymy pandemııamen kúreste aldyńǵy qatarda júrgen qazaqstandyq medıtsınalyq, áleýmettik qyzmetkerler men pedagogtardyń 70% áıelder ekenin atap ótti. Úkimet olarǵa qoldaý kórsetip, osy salalardaǵy qyzmetkerlerdiń eńbekaqysyn arttyrdy. Eńbekaqyny odan ári kezeń-kezeńmen arttyrý aldaǵy josparda kózdelgen. Áleýmettik qyzmetkerlerdiń mártebesin nyǵaıtý ázirlenip jatqan Áleýmettik kodekste qarastyrylǵanyn atady.
Elde áıelder men balalar quqyǵyn qorǵaý sharalary qabyldanýda. Memleket basshynyń tapsyrmasy boıynsha otbasylyq zorlyq-zombylyq jáne jynystyq sıpattaǵy qylmystarǵa qatysty jaýapkershilik kúsheıtildi, sondaı-aq mundaı qylmystardyń aldyn alý úshin zańnamalyq turǵyda jumystar júrgizilýde.
«Áıelderdiń quqyǵy men múmkindikterin arttyrýǵa Qazaqstan el ishinde de, jahandyq deńgeıinde de asa mán berýde. Áıelder men qyzdarǵa qatysty zorlyq-zombylyqty túbegeıli toqtatýǵa baǵyttalǵan BUU-nyń «Spotlight» bastamasyna Qazaqstan Úkimeti qoldaý tanytyp otyr. Bul jobanyń tutas Orta Azııa óńirine óz nátıjesin beretinine senimdimin», - dedi Lázzat Ramazanova.
Sonymen qatar, Qazaqstan 2021 jyly ótetin «Teń quqyly urpaq» (Generation Equality Forum) jahandyq forým aıasynda genderlik zorlyq-zombylyqtyń aldyn alý jáne ekonomıkalyq ádildik máselelerine qatysty Koalıtsııalarǵa belsendi túrde qatysatynyn atap ótti.
Onymen qosa, Ulttyq komıssııanyń tóraıymy aýǵandyq áıelderge arnalǵan bilim berý baǵdarlamasynyń iske asyrylý barysyna da toqtaldy. «100 aýǵandyq qyz-kelinshekti oqytý boıynsha Qazaqstan, Ózbekstan jáne EýroOdaqtyń birlesken úshjaqty jobasynyń ekinshi kezeńi bastaldy. Qyz-kelinshekterdiń basym bóligi túrli mamandyqtar boıynsha qazaqstandyq joǵary oqý oryndarda bilim alatyn bolady», - dedi Lázzat Ramazanova.
Sondaı-aq, aımaqtyq bilim ortalyǵyn iske qosýǵa jáne osy ortalyqtyń negizinde seriktesterdiń qoldaýymen áıelder men erlerdiń teń quqyǵyn qamtamasyz etý boıynsha ozyq tájirıbelermen almasatyn biryńǵaı bank qurýǵa Qazaqstannyń daıyndyǵyn jetkizdi.
«Bul Ortalyqtardyń jumysy jahandyq syn-qaterlerdi kezeń-kezeńmen jeńýge, turaqty damýdy ilgerletýge yqpal etedi», - dedi Lázzat Ramazanova.
Esterińizge sala óteıik, Áıelder jaǵdaıy jónindegi komıssııa – BUU-nyń Ekonomıkalyq jáne áleýmettik keńesi janyndaǵy qosalqy qurylymnyń biri. Onyń quramyna 45 el múshe. Komıssııanyń bıylǵy sessııasy gıbrıdtik formatta ótýde.
