Jahandyq daǵdarys jalpylama taraıtyn sıpatqa ıe bolyp otyr - Elbasy
ASTANA. QazAqparat - Jahandyq daǵdarys jalpylama taraıtyn sıpatqa ıe bolyp otyr. Búgin Astanadaǵy Táýelsizdik Saraıynda Qazaqstan Prezıdenti Nursultan Nazarbaev «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýynda osylaı málimdedi.
«Biz az nársege qol jetkizgen joqpyz. Álem shapshań qarqynmen qubylyp jatyr. Ózderińiz baıqaǵandaı, jańa dáýirge qadam basyp bara jatyrmyz. Kóz aldymyzda buǵan deıin bolmaǵan, basqalaı múmkindikterdi usynatyn jańa shynaıy jaǵdaı ornaýda. Búgingi tańda Qazaqstannyń ekonomıkasyna buǵan deıin bolmaǵan birqatar syrtqy faktorlar áser etýde. Jahandyq daǵdarystardyń oryn alýy bizge baılanysty emes. Ondaı jahandyq qubylystan eshkim de saqtana almaıdy. Erkin ekonomıkanyń damý júıesi de osyǵan saıady», - dedi N. Nazarbaev.
Budan bólek, Elbasy búgingi kúni damýdyń qaýipterin naqty baıqaý asa mańyzdy ekenin atap ótti. «Búgingi jahandyq daǵdarys jalpylama taraıtyn sıpatqa ıe. Búkil álemdik naryqtyń barlyǵy da turaqsyzdyq sıpatynda tur deýge bolady: qarjylyq, kómirsýtektik, azyq-túliktik jáne basqalary da turaqsyz. Bul - bizdiń eksporttyq taýarlarymyzǵa baǵanyń tómendeýine ákep soqtyrǵan basty sebep», - dedi N. Nazarbaev.
