Jahandyq daǵdarys saldarynan Qazaqstanda AES salý keıinge shegerilýi múmkin
ASTANA. QazAqparat - Jahandyq daǵdarys saldarynan Qazaqstanda atom elektr stansasyn salý merzimi keıinge shegerilýi múmkin. Bul týraly búgin Májilistegi Úkimet saǵatynda Energetıka mınıstri Vladımır Shkolnık málim etti.
Mınıstrdiń sózine qaraǵanda, búginge deıin Úkimettik komıssııamen Shyǵys Qazaqstan oblysynan burynǵy Semeı synaq alańynyń aýmaǵynan jáne Ońtústik Qazaqstan óńirinen Úlken aýylynan eki alań aıqyndalyp otyr. «Energetıkalyq teńgerimdilik pen keleshektegi atom qýatyn tasymaldaýdy damytý turǵysynan bul eki alań paıdaly delinip otyr. Sonyń ishinde, Semeı polıgonynda ornalasatyn stansanyń biri reseılik óndiristen bolýy da ábden yqtımal, al balqashtyq alańǵa kelsek, onda búkil álemde jasalyp jatqan jobalardyń bári de talqylaný ústinde. Sonyń eń ozyǵy tańdalady. Sheshim shyqqan joq, degenmen biz perspektıvaly stansa retinde japondyq «Toshiba Westinghouse» kompanııasyn qarastyryp otyrmyz», - dedi V. Shkolnık.
Onyń sózine qaraǵanda, AES árbir blogyn salý onyń qurylymyna qaraı 3-4 mlrd dollardyń shamasynda aıqyndalýy múmkin.
«Ekinshi AES salý múmkindigine kelsek, bunda barlyǵy elektr tutyný naryǵyna, ekonomıka ósimine, qosymsha energııany eksporttaý múmkindikterine baılanysty. Sonyń ishinde 2019 jyldan keıingi Eýrazııalyq ekonomıkalyq odaq aıasynda qurylatyn biryńǵaı energetıkalyq keńistikte jaǵdaı qalaı bolady, soǵan d baılanysty. Degenmen, qazirgi jahandyq ahýalǵa oraı AES qurylysy merzimin keıinge shegerý yqtımaldyǵyn da joqqa shyǵara almaımyn», - dedi V. Shkolnık.
