Jahandyq daǵdarys aıaqtalǵanymen qaýip-qater áli de bar - Baqytjan Saǵyntaev

SOChI. QazAqparat - QR Premer-Mınıstri Baqytjan Saǵyntaev Shanxaı yntymaqtastyq uıymy úkimet basshylarynyń 16-shy otyrysynda sóz sóılep, ózara yntymaqtastyqtyń mańyzdy máselelerine toqtaldy, dep xabarlaıdy QazAqparat tilshisi.

«Jahandyq daǵdarystan keıin jaǵdaıymyz turaqtalyp kele jatsa da, álemdik ekonomıkada qaýip-qaterler áli de bar. Mundaıda kópjaqty yntymaqtastyqty kúsheıtý kerek. Sonyń arqasynda ShYU-ǵa múshe barlyq memleketterdiń turaqty damýyna qamtamasyz etýge bolady. Osy oraıda Shanxaı yntymaqtastyq uıymynyń kópjaqty saýda-ekonomıkalyq áriptestik baǵdarlamasyn, uıym aıasyndaǵy birlesken sharalardy, sondaı-aq ShYU-nyń 2025 jylǵa deıingi damý strategııasyn sapaly júzege asyrǵan mańyzdy», - dedi Baqytjan Saǵyntaev.

Úkimet basshysy elimizdiń aımaqtyq ıntegratsııany, kórshilermen tyǵyz qarym-qatynasty damytýdy kózdeıtinin jetkizdi. Bizdiń muxıtqa shyǵar jolymyz joq. Sol sebepti Qazaqstan «Nurly jol» memlekettik baǵdarlamasyn EAEO aıasyndaǵy ıntegratsııamen de, Qytaıdyń «Bir jol - bir beldeý» bastamasymen de úndestirýge múddeli.

Baqytjan Saǵyntaevtyń aıtýynsha, ShYU elderiniń geografııalyq ornalasýy kólik salasyndaǵy yntymaqtastyqty jan-jaqty damytýǵa yńǵaıly. Al ózara saýda-sattyqty arttyrý úshin mýltımodaldy tasymal men kólik ınfraqurylymyn kúsheıtý kerek. «Osy turǵyda biz ShYU-ǵa múshe memleketterdiń úkimetteri arasyndaǵy xalyqaralyq avtomobıl tasymalyna yńǵaıly jaǵdaı jasaý týraly kelisimdi iske asyratyn komıssııa jumysynyń bastalǵanyna qýanyshtymyz. Sondaı-aq, biz ShYU-nyń joldardy damytý baǵdarlamasyn ózara kelisýge jáne qol qoıýǵa daıynbyz», - dep atap kórsetti QR Premer-Mınıstri.

Óz sózinde Baqytjan Ábdiruly tsıfrlyq texnologııalar men azyq-túlik qaýipsizdik máselesine toqtaldy. ShYU Іskerlik keńesi men ShYU Bankaralyq birlestiginiń shaǵyn jáne orta bıznesti damytýǵa óz septigin tıgize alatynyn jetkizdi. QR Premer-Mınıstriniń oıynsha, qazirgi jobalardy iske asyryp, naqty nátıjege qol jetkizý úshin qarjy mexanızmderin, sonyń ishinde ShYU Damý banki men arnaıy esep-shotyn qolǵa alý qajet.

Aıta keteıik, Sochıde ótken otyrysqa Reseı, Ózbekstan, Tájikstan, Qyrǵyzstan men Qytaıdyń úkimet basshylary qatysty. Uıymnyń jańa músheleri - Pákistan men Úndistan da alǵash ret óz ókilderin jiberdi.