Jahandyq básekelestik reıtıngindegi Qazaqstannyń kórsetkishi birden 21-ge kóterilýine bilim-ǵylym júıesiniń úlesi zor
ASTANA. 9 qarasha. QazAqparat - Búgin Senatta «Ǵylym týraly» QR Zańynyń jáne Údemeli ındýstrııalyq-ınnovatsııalyq damý jónindegi 2010-2014 jyldarǵa memlekettik baǵdarlamanyń iske asyrylýy aıasynda ǵylym damýynyń jaı-kúıi men perspektıvalary» taqyrybyna arnalǵan konferentsııa barysynda sóz sóılegen Bilim jáne ǵylym mınıstri Baqytjan Jumaǵulov osylaı málim etti.
Sóz arasynda mınıstr byltyr qabyldanǵan «Ǵylym týraly» jańa zańǵa toqtala kele, ol eldiń ǵylymı salasyna túbegeıli ózgerister ákelgenin, ǵalymdar úshin, iri ǵylymı jáne ınnovatsııalyq jetistikter úshin keleshegi zor jańa múmkindikterge jol ashqanyn atap ótti. «Alǵashqy jáne naqty nátıjelerdiń biri - Davos forýmynda jarııalanǵan Básekege qabilettilik reıtıngindegi Qazaqstannyń joǵary kórsetkishi. Bul reıtıng boıynsha Qazaqstan kórsetkishi birden 21 pozıtsııaǵa kóterildi. Eshbir elde bir jyldyń ishinde mundaı ósý bolmaǵan», - deıdi B. Jumaǵulov. Onyń aıtýynsha, mundaı nátıjege qol jetkizýde bilim men ǵylym júıesiniń úlesi zor. Óıtkeni, reıtıngtegi kórsetkishterdiń birqatary bilim men ǵylym salasyna qatysty bolyp tabylady. Máselen, jahandyq reıtıngte «Ýnıversıtetter men bıznestiń yntymaqtastyǵy» - 29 pozıtsııaǵa joǵarylasa, «Personal biliktiligin arttyrý»- 24 pozıtsııaǵa, «Ǵylymı-zertteý uıymdarynyń sapasy» 13 pozıtsııaǵa kóterilgen.
«Zertteý, bilim berý qyzmetteriniń qoljetimdigin baǵalaý barynsha jaqsardy. Sonymen qatar, bastaýysh, matematıkalyq jáne ǵylymı-jaratylystaný, bilim berý jáne t.b. sapasy da artty. Jalpy, bilim jáne ǵylym salasy eldiń básekege qabiletin arttyrýǵa qomaqty úles qosty. Elbasy N.Nazarbaevtyń alǵa qoıǵan bastamalaryn odan ári iske asyrý arqyly keleshekte de zor nátıjelerge qol jetkizemiz», - dedi mınıstr.
