Jahandaný zamanynda jastar úshin aıqasýǵa týra keledi - Epıskop Gennadıı
«Qazirgi kezeń osy ǵasyrdyń basyndaǵy ómirge múlde uqsamaıdy. Álemmen birge adamdar da qatty ózgerip barady. Biz bul ózgeristerdi jastardyń ómirin baqylaı otyryp, aıqyn baıqaımyz. Aqparattyq tehnologııalardyń dáýiri keldi. Ótken ǵasyrdyń alpysynshy jyldary men eń kóp oqıtyn fılosof, teńdessiz oıshyl Marshall Maklıýenniń sózin keltirgim keledi. Ol «Elektr shynjyry ýaqyt pen keńistikti joıady» degen edi, - dedi Gennadıı Kaskelenskıı Álemdik jáne dástúrli dinder kóshbasshylarynyń VI seziniń paneldik otyrysynda.
Onyń aıtýynsha, gadjetterge degen táýeldilikke aýyldardyń ózderi dýshar bolǵan.
«Reseıde ózen jaǵasyndaǵy kórkem aýyldardyń birine barǵanymda qatty oılandyryp tastaǵan bir jaǵdaıǵa tap boldym. Negizi, osynaý saıajaıly aýylǵa osydan 10 jyl buryn da barǵanmyn. Shýlaǵan balalardyń kóptigi sonsha, ońashada erkin duǵa etýdiń, jumys isteýdiń ózi qıynǵa soqqany esimde. Búkil kóshelerde balalar tolyp júretin. Mine, sol aýylǵa on jyldan keıin kelip, kóshede birde-bir balany kezdestire almadym. Kóshedegi egdeleý bir kisiden «Balalar qaıda?» dep surasam, balalar negizi burynǵydan da kóp ekenin, alaıda olar kóshege shyǵyp oınaýǵa gadjetter men kompıýterden qoldary bosamaı jatqanyn aıtty», - deıdi ol.
Onyń aıtýynsha, balalar qazirgi zamanda vırtýaldy álemniń tutqynyna aınalǵan.
«Transgýmanızmniń ıdeologtary oıǵa kirmeıtin ózgeristerdiń kele jatqanyn aıtady. Máselen, neırokompıýterlik jeli kompıýter men adamnyń mıyn jalǵastyra alatynyn aıtady. Ary qaraı ne bolmaq? Biz árbir adamnyń basyna keletin ózgeristerdiń aldynda turmyz. Aqparattyq tehnologııalardyń, tipti bes-alty jyl burynǵy úlgilerin qazirgimen salystyra almaısyz. Qazir ınternet jańa mádenıetti qura alatyndaı dárejege jetti», - deıdi epıskop.
Mine, sondyqtan Qazaqstannyń pravoslav shirkeý isteri jónindegi jetekshisiniń aıtýynsha, jahandaný zamanynda jastar úshin aıqasqa túsýge týra keledi.
Eske sala ketsek, Álemdik jáne dástúrli dinder kóshbasshylarynyń VI sezi Astanada keshe bastalǵan bolatyn. Alqaly jıynǵa barlyq álemdik jáne dástúrli dinderdiń ókilderi, sonymen qatar bedeldi dinı lıderler, saıası qaıratkerler men halyqaralyq uıym ókilderinen quralǵan 46 elden 82 delegatsııa qatysýda.
