Jahandaný dáýiri jastardyń barynsha qabiletti bolýyn talap etedi - M. Áshimbaev
ASTANA. Sáýirdiń 28-i. QazAqparat /Qanat Mámetqazyuly/ - Jahandaný dáýiri jastardyń barynsha qabiletti bolýyn talap etedi. Búgin, elordada «Jastar Qazaqstan halqynyń birligi úshin» atty jalpyulttyq forýmy barysynda sóz sóılegen QR Prezıdenti Ákimshiligi basshysynyń orynbasary Máýlen Áshimbaev osylaı málim etti,
dep habarlaıdy QazAqparat.
«Táýelsiz Qazaqstannyń bolashaǵynyń baıandy, kelesheginiń kemel bolýy jastarǵa tikeleı baılanysty. Sondyqtan da, el de Elbasy da jastarǵa úlken úmitpen qaraıdy. Prezıdent N. Nazarbaev egemendiktiń alǵashqy kúninen bastap jastar bolashaǵyna barynsha mán berip keledi. Bul rette jastar úshin barlyq jaǵdaılar jasalýda. Sonymen birge, búgingi kúni Qazaqstandaǵy jastar saıasaty jańa damý kezeńine qadam basyp otyr ári bundaı damý deńgeıi esh tolastamaýy kerek. Óıtkeni, jahandaný dáýiri jastardyń barynsha qabiletti bolýyn talap etedi», dedi M. Áshimbaev.
Sonymen birge, ol el erteńi úshin búgingi tolqynnyń azamattyq pozıtsııalary, erik-jigerleri asa qajet ekendgin atap ótti. Sondaı-aq M. Áshimbaev táýelsizdikten beri memlekettik jastar saıasaty boıynsha atqarylǵan sharalarǵa toqtala kele, aldaǵy ýaqytta elimizdiń shyqqan belesi men alar asýy da zor ekendigin aıtty.
«Bul jolda eń áýeli jastardyń qajyr-qaıraty men bilimine úmit artylady. Táýelsizdiktiń tamyryn tereńdetip, Qazaqstandy myqty, irgeli elge aınaldyrý jastardyń qolynda, solardyń jaýapkershiliginde. Sondyqtan da jastar qaýymy qazirgi ýaqyttyń kez kelgen synaǵyna ázir bolyp, básekege tótep berýi shart», dedi M. Áshimbaev.
