Jahandaný dáýiri salmaqty jaýapkershilik júkteıdi - Jastar resýrstyq ortalyǵynyń dırektory
«Elbasynyń qatysýymen ótken forýmda san salada óziniń talantymen tanylǵan jalyndy jastardyń kótergen máseleleri, usynystary men aqedil nıetteri erekshe áserge bóledi. Búgingi jahandaný dáýiri jastardyń boıyna úlken jaýapkershilik júkteıdi. Sondyqtan da árbir qazaqstandyq azamat óziniń jalyndy shaǵynda el úshin ıgilikti is tyndyryp, Otanynyń gúldenýi, óz kásibiniń jandanýy jolynda tynbaı eńbektenýi tıis. Bul oraıda forým barysynda sóz alǵan árbir jastyń boıynan biz atap ótken dúnıelerdi kórip, olardyń rýhty sózderinen qýat alyp, bolashaq jolynda aıanbaı eńbek eterin ańǵardyq», - deıdi ol.
Ortalyq dırektorynyń aıtýynsha, «Daryn» memlekettik syılyǵynyń ıegeri Mereı Qarttyń jas qalamgerlerge qoldaý suraǵan lebizi jastardyń kóńilin kókjıekpen astastyrǵandaı boldy.
«Ol qasıetti qalamnyń qýatymen tarıh qatparynda qalǵan uly oqıǵalardy qaıta tiriltip júrgen barsha jazarman qaýymnyń atynan nıet bildirip, álemge qazaq jazýshylaryn tanytý jolynda jas qalamgerlerdiń akademııasyn ashý týraly usynysyn jetkizdi. Sóz sońynda rýh janıtyn jyr joldaryn pash etti. Ádebıetpen jany egiz halyqtyń ókili retinde jalyndaǵan jastardyń qazaq tarıhy men ótkenin tiriltýge zor úles qosaryna senimdimiz. Sonymen qatar, san salada tolaıym tabysqa jetken jastardyń erteńgi kúni el kóshin órge súırer bir-bir qaıratkerge aınalaryna da shek keltirmedik», - dedi Jandos Baýyrjanuly.
Ol forým barysynda kóterilgen árbir másele men usynystar el ıgiligi úshin ekenin atap ótti.
«Sondyqtan da ǵylym men bilim, ekonomıka men san salanyń damyp, elimizdiń ozyq órkenıetti memleketterdiń qataryna qosylýy úshin jastardyń atqarýǵa tıis jumystary jeterlik. Bul turǵyda Elbasy: «Árkim óz mamandyǵy boıynsha eńbek etip, sonyń túbine jetip, elge jemisin kórsetýi kerek. Ártúrli baǵytqa bir bara berýdiń qajeti joq. Óziń qalaǵan salanyń sańlaǵy bolýyńdy ǵana myǵym maqsat etýge tyrys», - degen sarynda aıtqan parasatty paıymy erekshe áser etti. Sondyqtan da barsha jalyndy jandar úshin bıylǵy jyl berekeli, tabysty bolatynyna senimimiz kámil», - dedi Almaty oblystyq Jastar resýrstyq ortalyǵynyń dırektory.
Eske salaıyq, keshe, 23 qańtar kúni Astanada Nursultan Nazarbaevtyń qatysýymen Jastar jylynyń saltanatty ashylý rásimi ótti.
Aıta ketsek, Prezıdent Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn. Arada bir aıdan astam ýaqyt ótkennen keıin Elbasy Jarlyǵymen 2019 jyl Jastar jyly bolyp resmı túrde jarııalandy.
