Jaǵymsyz ıiske shaǵym azaımaı tur: Shymkentte kásiporyndarǵa 89,6 mln teńge aıyppul salyndy
ShYMKENT. KAZINFORM — Shymkent qalasyndaǵy ındýstrıaldy aımaqtarda búginde 322 kásiporyn jumys isteıdi. Sońǵy úsh jylda turaqty kózderden atmosferaǵa taralatyn lastaýshy zattardyń kólemi aıtarlyqtaı artqan.
Resmı málimetke sáıkes, Shymkent qalasynda 2023-2025 jyldar aralyǵynda aýaǵa shyǵarylǵan lastaýshy zattardyń kólemi 31,6 myń tonnadan 40,05 myń tonnaǵa deıin ósken.
— Bul jaǵdaı qala aýmaǵynda jańa ındýstrıaldy aımaqtardyń ashylýy, óndiris oryndarynyń kóbeıýi jáne avtokólik sanynyń artýymen baılanysty. Qaladaǵy atmosferalyq aýanyń sapasyna ındýstrıaldy aımaqtarda ornalasqan kásiporyndardyń da áseri bar, — dedi qalalyq ekologııa departamentiniń basshysy Ermahan Qozybaev.
Onyń málimetinshe, bıylǵy bes aıda ekologııalyq talaptardyń saqtalýyn baqylaý maqsatynda 26 tekserý júrgizilgen. Nátıjesinde 39 ákimshilik is qozǵalyp, jalpy somasy 89,6 mln teńge kóleminde aıyppul salynǵan.
— Atmosferalyq aýaǵa ruqsatsyz jáne belgilengen normadan tys shyǵaryndylar shyǵarǵany úshin «Rock Minerals» JShS-ne 17 mln 607 myń teńge, al «Polymettech» JShS-na 63 mln 960 myń teńge kóleminde aıyppul salyndy, — dedi spıker.
Sonymen qatar sot sheshimimen ekologııalyq zańnamany buzǵan «Sý resýrstary Marketıng», «Rock Minerals» jáne «Polymettech» JShS-nyń qyzmeti ýaqytsha toqtatyldy.
Spıkerdiń aıtýynsha, Polıtsııa departamentimen birlesip, belgilengen shyǵaryndylar normasynan asatyn avtokólik quraldaryn anyqtaý boıynsha reıdtik is-sharalar jalǵasyp jatyr.
Sondaı-aq qaladaǵy tórt iri kásiporynda — «PKOP», «Standarttsement», «Shymkenttsement» JShS-lary jáne «3-Energoortalyq» AQ-da avtomattandyrylǵan ekologııalyq monıtorıng júıeleri engizilgen.
Degenmen, turǵyndardyń jaz mezgilindegi jaǵymsyz ıiske qatysty shaǵymdary áli de azaımaı otyr.
— Jaǵymsyz ıistiń kózin anyqtaý maqsatynda monıtorıng jumystary júrgizilip jatyr. Sonymen qatar Qazgıdromet RMK-nyń qala aýmaǵyndaǵy jeti baqylaý beketi atmosferalyq aýanyń sapasyn turaqty baqylaýda ustap otyr. Jyl basynan beri ekstremaldy joǵary lastaný derekteri tirkelgen joq, — dedi Ermahan Qozybaev.
Aıta keteıik, 8 maýsymda júrgizilgen ǵaryshtyq monıtorıng nátıjesinde qala aýmaǵynda ruqsat etilmegen jerlerde ornalasqan 31 zańsyz qoqys úıindisi anyqtalǵan. Olardy joıý úshin aýdan ákimdikteri men polıtsııanyń aýmaqtyq bólimshelerine tıisti tapsyrmalar berilgen.
Buǵan deıin Shymkent turǵyndary qaladaǵy jaǵymsyz ıiske baılanysty shaǵym aıtyp júrgeni habarlanǵan bolatyn.
