Jaǵy synǵan sarbaz isi: jábirlenýshi kúdiktimen tatýlasty
ASTANA. KAZINFORM — Otardaǵy áskerı bólimde jaýyngerlik boryshyn ótep júrgende, soqqyǵa jyǵylyp, jaǵy synǵan sarbaz Esbol Qapar isindegi kúdikti qylmystyq jaýapkershilikten bosatyldy. Bul jóninde Bas áskerı prokýratýrasy resmı saýalymyzǵa bergen jaýabynda málimdedi.
— Almaty garnızony áskerı sotynyń qaýlysymen, E.Q. Qapardyń jaǵy synýy deregi boıynsha Gvardeısk garnızonyndaǵy 21450 áskerı bóliminiń sarbazy Q.Á. Aldabergen QR Qylmystyq kodeksi 440-babynyń 2-1-bóligi boıynsha (áskerı qyzmetshiler arasynda baǵynyshtylyq qatynastar bolmaǵan kezde olardyń arasyndaǵy ózara qarym-qatynastardyń jarǵylyq qaǵıdalaryn buzyp, densaýlyqqa aýyrlyǵy ortasha zııan keltirilip jasalǵan is-áreket) kináli dep tanylyp, jábirlenýshi E.Q. Qaparmen ózara tatýlasýyna baılanysty qylmystyq is QK-niń 68-baby 1-bóligimen óndiristen qysqartylyp, kináli qylmystyq jaýaptylyqtan bosatylǵan, — delingen resmı jaýapta.
Degenmen, Bas áskerı prokýratýrasynyń habarlaýynsha, bul faktige baılanysty taǵy bir qylmystyq is qozǵalǵan.
— Sonymen qatar, QR ІІM Ońtústik óńirlik Áskerı tergeý basqarmasy Gvardııa bólimimen jáne Gvardeısk garnızony Áskerı polıtsııa bólimimen áskerı qyzmetshilerge qatysty QK-niń 451-babyna (bılikti asyra paıdalaný) jáne QK-niń 440 baby (áskerı qyzmetshiler arasynda baǵynyshtylyq qatynastar bolmaǵan kezde olardyń arasyndaǵy ózara qarym-qatynastardyń jarǵylyq qaǵıdalaryn buzý) boıynsha sotqa deıingi tergep-tekserý júrgizilip jatyr. Іs boıynsha tıisti tergeý amaldary men saraptamalar júrgizilip, qazirgi tańda sotqa deıingi tergep-tekserý jalǵasyp keledi. Qylmystyq-protsestik kodeksiniń 201-babyna sáıkes, sotqa deıingi tergep-tekserýdiń ózge derekteri jarııa etilýge jatpaıdy, — delingen habarlamada.
Eske salaıyq, buǵan deıin oqıǵanyń mán jaıyn tolyq jazǵanbyz. Zardap shekken sarbazdyń týystary taratqan aqparatqa saı, ony serjant temirmen uryp, jaǵyn syndyrǵan. Alaıda serjanttyń ózi muny joqqa shyǵaryp, jaraqat alǵan sarbaz ózi sekildi qatardaǵy jaýyngermen tóbeleskenin aıtqan edi.
Al QR Qarýly Kúshteri áskerı polıtsııasy bas basqarmasy áskerı qyzmetshige qatysty kúsh qoldaný faktisi boıynsha qylmystyq is qozǵalǵanyn málimdegen bolatyn.
Qorǵanys mınıstrliginiń baspasóz qyzmeti osy oqıǵaǵa baılanysty úsh komandır men orynbasary qyzmetinen bosatylǵanyn málim etti.
Al kúdikti retinde jábirlenýshiniń boryshtasy aıyptalyp, ústinen qylmystyq is qozǵalǵanyn habarlaǵan edik.
Sonymen qatar, áskerde jaǵy synǵan sarbaz basqa bólimge aýystyryldy.
