Jaǵdaıy nasharlaǵan Rım Papasy emin aýrýhanada jalǵastyratyn boldy

ASTANA. KAZINFORM — Vatıkannyń habarlaýynsha, pontıfıkke tynys joldarynyń polımıkrobtyq ınfektsııasy dıagnozy qoıylǵan soń ol emdeýdiń jańa kýrsyn alyp, aýrýhanada taǵy jatýy tıis, dep habarlaıdy Euronews. 

— Rım Papasy Frantsısktiń jaǵdaıy buryn oılaǵannan da aýyr jáne onyń aýrýhanada bolý merzimi uzartylady, — delingen dúısenbi kúni Vatıkannyń málimdemesinde.

Habarlanǵandaı, 88 jastaǵy pontıfıkke tynys joldarynyń polımıkrobtyq ınfektsııasy dıagnozy qoıyldy, ol «aýyr klınıkalyq jaǵdaıdy» sheshý úshin onyń emdelýin ózgertýdi talap etti.

Vatıkannyń baspasóz hatshysy Mattero Brýnı emdelý merzimi qansha ýaqytqa sozylatynyn aıtpady, biraq aýrý belgileriniń aýyrlyǵy «aýrýhanada jatýdy qajet etetinin» aıtty. 

Onyń aıtýynsha, Rım Papasy Frantsısk jaqsy uıyqtap, birneshe gazet oqyp, tańǵy as ishken.

Ótken aptada rım-katolık shirkeýiniń basshysy respıratorlyq ınfektsııaǵa baılanysty «dıagnostıkalyq synaqtar» úshin Rımdegi Agostıno Djemellı aýrýhanasyna jatqyzyldy. Onyń keńsesi pontıfıktiń osy aptadaǵy kezdesýleri, sonyń ishinde sársenbige josparlanǵan aýdıentsııanyń ótkizilmeıtinin rastady.

Ol sondaı-aq jeksenbide apta saıynǵy Angelus duǵasyn jiberip aldy — bul jetekshilik etýiniń 12 jyly ishinde ekinshi ret qaıtalanǵan oqıǵa.

Jas kezinde týǵan jeri Argentınada ol aýyr pnevmonııadan zardap shekkennen keıin ókpesiniń bir bóligi alyp tastalǵan edi. 2023 jyly ol bronhıt dıagnozymen aýrýhanaǵa jatqyzyldy.

Buǵan deıin habarlanǵandaı, Qazaqstannyń Vatıkandaǵy elshisi Rım Papasyna senim gramotalaryn tapsyrdy.