Jaǵdaıy kúrt nasharlaǵan pavlodarlyq sábı TJM tikushaǵymen Astanaǵa shuǵyl jetkizildi
ASTANA. KAZINFORM – Shuǵyl túrde medıtsınalyq kómek qajet bolǵan náreste TJM tikushaǵymen elorda aýrýhanalarynyń birine jetkizildi, dep habarlaıdy Tótenshe jaǵdaılar mınıstrliginiń baspasóz qyzmeti.
Mınıstrliktiń málimetine súıensek, «Qazavıaqutqarý» tikushaǵy Astana - Pavlodar - Astana baǵyty boıynsha sanıtarlyq reısti oryndaǵan.
«Sábıge shuǵyl medıtsınalyq kómek qajet boldy. Ushqyshtar men dárigerlerdiń úılesimdi jáne jedel áreketteriniń arqasynda bala aman-esen jetkizildi», delingen TJM-niń resmı aqparatynda.
Sondaı-aq mınıstrliktiń baspasóz qyzmeti tikushaqtary eldi mekenderdiń bir-birinen alshaqtyǵy jaǵdaıynda shuǵyl medıtsınalyq kómek kórsetýge árdaıym daıyn ekenin atap ótti.
Aıta ketsek, buǵan deıin Pavlodarda anasy men balasy úıinde óli tabylǵanyn jazǵanbyz.