«Jaǵdaıy aýyr»: Qaraǵandy ferroqorytpa zaýytynda apat bolyp, 8 qyzmetker zardap shekti
QARAǴANDY. KAZINFORM – Qaraǵandyda ferroqorytpa zaýytynyń peshinen kenetten jalyn shyqty. TJ saldarynan kásiporynnyń 8 qyzmetkeri zardap shekti, dep habarlaıdy Kazinform agenttiginiń tilshisi.
Búgin, 20 shildede, tańǵy saǵat 04:10-da YDD Corporation ferroqorytpa zaýytynda shtattan tys oqıǵa boldy.
«№1 peshte jalyn kenetten shyqty. Saldarynan kásiporynnyń 8 qyzmetkeri túrli dárejede jaraqat aldy. Qazirgi ýaqytta zardap shekken barlyq qyzmetker aýrýhanada, olarǵa shuǵyl medıtsınalyq kómek kórsetilip jatyr», - dep túsindirdi «YDD Corporation» baspasóz qyzmeti.
Sondaı-aq, kompanııa zardap shekkenderge barlyq kómek kórsetetiletinin jáne aýrýhananyń medıtsınalyq qyzmetkerlerimen únemi baılanysta bolatynyn habarlady. Densaýlyq saqtaý basqarmasy zardap shekkenderdiń jaǵdaıy týraly túsinikteme berdi.
«2024 jylǵy 20 shildede Professor H.J.Maqajanov atyndaǵy kópsalaly aýrýhanaǵa óndiriste alǵan kúıik jaraqattarymen ónerkásip kásipornynyń 8 qyzmetkeri jetkizildi. Zardap shekkenderdiń altaýy reanımatsııa jáne qarqyndy terapııa bólimine, ekeýi kombýstologııa bólimine jatqyzyldy. Zardap shekken bes adamnyń jaǵdaıy óte aýyr, ekeýi aýyr, bir naýqas ortasha aýyr dep baǵalanady. Zardap shekkenderdi beıindi mamandar qarady. Qosymsha tekserýler júrgizildi. Patsıentter tolyq kólemdi barlyq qajetti em alyp jatyr», - dep habarlady Qaraǵandy oblysy Densaýlyq saqtaý basqarmasynyń baspasóz qyzmeti.
Atalǵan fakti boıynsha qylmystyq is qozǵaldy.
«Qaraǵandydaǵy ferroqorytpa zaýytynda bolǵan fakt boıynsha QR QK 156-babynyń 2-bóligi «Eńbekti qorǵaý erejelerin buzý nátıjesinde abaısyzda densaýlyqqa aýyr zııan keltirý» boıynsha qylmystyq is qozǵaldy. Qazirgi ýaqytta tergeý sharalary júrgizilip jatyr. Mán-jaılar anyqtalyp jatyr», - dep habarlady Qaraǵandy oblysy PD baspasóz qyzmeti.
Sonymen qatar bul jaǵdaıǵa baılanysty arnaıy komıssııa quryldy.
«Qaraǵandydaǵy ferroqorytpa zaýytynda bolǵan fakt boıynsha bolǵan oqıǵanyń sebebi men mán-jaıyn tekserý úshin Eńbek ınspektsııasy komıssııa qurdy», - dep málimdedi Eńbek ınspektsııasy basqarmasynyń baspasóz qyzmeti.
