Jaǵdaıdy teris paıdalanyp, baǵany negizsiz kótergen janarmaı quıý beketiniń ıeleri jaýapkershilikke tartylady

ASTANA. QazAqparat - Búgin selektorlyq keńes barysynda QR Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıtetiniń tóraǵasy Serik Jumanǵarın aýmaqtyq bólimshelerge óńirlerde AI-92/93 markaly benzın baǵalarynyń negizsiz ósýine jáne «jasandy» tapshylyq qurýǵa (múmkindigi bola tura, ótkizý kólemderin qysqartý) jol bermeýdi tapsyrdy, dep habarlady vedomstvonyń baspasóz qyzmetinen.

«Kásipkerlerge berilgen AI-92/93 markaly benzınge baǵalardy óz betinshe aıqyndaý múmkindigin eskere kele, monopolııaǵa qarsy vedomstvonyń óńirlik bólimsheleri monopolııaǵa qarsy zańnamanyń saqtalýyn qatań baqylaýda ustaýy tıis. Áńgime, eń aldymen, benzındi bólshek saýdada ótkizý naryǵyndaǵy avtojanarmaı quıý stantsııalary ıeleriniń ózderiniń ústem jaǵdaıyn teris paıdalanýy týraly bolyp otyr»,- dep atap ótti Serik Jumanǵarın.

QR UEM TMRjBQK-niń aýmaqtyq bólimshelerine ústem jaǵdaıdy teris paıdalanýǵa, baǵalyq sóz baılasý men josyqsyz básekelestikke jol bermeýdi baqylaý bóliginde monopolııaǵa qarsy retteý sharalaryn kúsheıtý tapsyryldy.

Sonymen, monopolııalyq joǵary baǵa belgileý belgileri bolǵan jaǵdaıda, TMRjBQK qyzmetkerleri benzın baǵasynyń qurylymyn (baǵany belgileý/kóterý úshin negiz bolyp tabylǵan AJQS-nyń shyǵyndary) taldaıtyn bolady. Eger, baǵa keltirilgen shyǵyndarǵa sáıkes kelmeıtin bolsa, osy is-áreketterdi «Básekelestik týraly» QR Zańynda tyıym salynǵan is-áreketterge jatqyzýǵa barlyq negiz bar. «Básekelestik týraly» QR Zańyna sáıkes naryq sýbektilerine joǵary aıyppul sanktsııalary salynatyn bolady.