Jaǵdaı byltyrǵydan jaman bolmaıdy – mınıstr sý máselesi jaıly
TAShKENT. KAZINFORM – Qazirgi ýaqytta Shardaraǵa sý jınaý jumysy júrgizilip jatyr, dep habarlaıdy Kazinform agenttiginiń menshikti tilshisi.
Bul týraly Tashkentte Ózbekstannyń Sý sharýashylyǵy mınıstri Shavkat Hamraevpen kezdesýden keıin Kazinform tilshisiniń saýalyna jaýap bergen QR Sý resýrstary jáne ırrıgatsııa mınıstri Nurjan Nurjigitov aıtty.
- Qazirgi ýaqytqa deıin Shardara qoımasyna 4,5 mlrd tekshe metr sý jınaldy. Ótken jyldyń sáıkes kezeńimen salystyrǵanda bul 1,87 mlrd tekshe metrge artyq. Tıisinshe, Qyzylordadaǵy kólshikterge 800 mln, Soltústik Aralǵa 900 mln tekshe metrden astam sý jiberildi, - dedi Nurjan Nurjigitov.
Sonymen qatar, vedomstvo basshysy sý máselesine qatysty 2025 jylǵa qandaı boljam jasalǵanyn málim etti.
- Biz keıingi 4 aıda atqarylǵan jumystarǵa taldaý jasadyq. Nátıje jaqsy. Bıyl da jaǵdaı byltyrǵydan jaman bolmaıdy, - dep túıindedi N.Nurjigitov
Eske salaıyq, bıyl 29 qantarda Dýshanbe qalasynda Ortalyq Azııanyń Memleketaralyq sý sharýashylyǵyn úılestirý komıssııasynyń 88-shi otyrysy ótti. Onyń barysynda jasalǵan kelisim nátıjesinde Qazaqstan kórshiles elderden kóktemde 11 mlrd tekshe metr sý alatyn boldy.
Sondaı-aq, qazir Qazaqstan men Ózbekstan sý bólý kelisiminiń jobasyn ázirlep jatqanyn jazyp edik.