Jaǵdaı áli kúrdeli: Sý ortasynda qalǵan 64 aýylmen qatynas úzilgen
ASTANA. KAZINFORM - TJM daǵdarys ortalyǵynda vıtse-premer – sý tasqynyna qarsy sharalardy úılestirý jáne qarǵyn sý júrý kezeńiniń saldaryn joıý jónindegi respýblıkalyq shtab basshysynyń orynbasary Qanat Bozymbaev pen tótenshe jaǵdaılar mınıstri Shyńǵys Árinovtiń qatysýymen keńes ótti.
3 sáýirdegi jaǵdaı boıynsha eldegi sý tasqynyna qatysty ahýal áli de kúrdeli. 6 óńirde 1 364 jeke menshik turǵyn úıdi sý basqan.
Avtojoldardyń 105 ýchaskesinde sý jaıylǵan. 78 jol ýchaskesinde búlingen jerlerdi jáne 4 kópirdi qalpyna keltirý jumystary júrgizilip jatyr.
64 eldi mekenge kólik qatynasy joq, olarǵa azyq-túlik pen dári-dármek jetkizilýde.
Sý basqan aımaqtardan turǵyndardy evakýatsııalaý táýlik boıy júrgizilip jatyr. Sońǵy táýlikte qutqarýshylar 1 524 adamdy, onyń ishinde 496 balany evakýatsııalady.
Oblystaǵy sý aıdyndarynda muz keptelisin boldyrmaý úshin muz jarý jumystary júrgizilýde.
Sý tasqynyna qatysty ahýaldy baǵalaý úshin 1-3 sáýir aralyǵynda vıtse-premer men tótenshe jaǵdaılar mınıstri Qaraǵandy, Qostanaı jáne Aqmola oblystarynyń aýmaǵyn áýeden barlady.
Búgin Arshaly, Tselınograd aýdandary men Qosshy qalasynyń aýmaǵyn zerttedi, sondaı-aq Preobrajenskıı sý torabyna bardy.
Qazirgi ýaqytta oblysta qar jamylǵysy — shamamen 76%.
TJM kúsh-quraldary Tselınograd, Arshaly, Atbasar, Sandyqtaý aýdandarynyń, Kókshetaý jáne Qosshy qalalarynyń 17 eldi mekenine bólindi.
Qaraǵandy oblysynyń aýmaǵynda qar jamylǵysy — shamamen 34%.
Oblysta aldyn alý is-sharalary, onyń ishinde jaǵalaýdy nyǵaıtý jumystary jáne qapshyqtardy tóseý jumystary júrgizilýde.
Barlyǵy 700-ge jýyq adam jáne 118 tehnıka jumyldyryldy. Qazir jaǵdaı turaqty.
Qostanaı oblysy boıynsha qar jamylǵysy — shamamen 71%.
75 turǵyn úı men 38 aýla aýmaǵyn sý basqan.
Atalǵan eldi mekenderge TJM-niń Shyǵys Qazaqstan, Qaraǵandy jáne Qyzylorda oblystarynan barǵan qosymsha kúsh-quraldary tartyldy, jaǵalaýdy nyǵaıtý jumystary júrgizilip jatyr.
Qazir Arqalyq qalasy men Amangeldi aýdanynda jaǵdaı turaqtaldy. Jangeldi aýdanynda jaǵdaı áli kúrdeli. Ákimdik barlyq qajetti sharalardy qabyldaýda.
Óńirlerde shyǵyndy baǵalaý boıynsha jumystar bastaldy. Táýlik boıy monıtorıng júrgizilýde.
Aldaǵy kúnderi elimiz boıynsha jaýyn-shashyn jáne temperatýralyq fonnyń kúrt kóterilýi kútilýde, bul qardyń qarqyndy erýine ákeledi.
Keńes qorytyndysy boıynsha respýblıkalyq shtab basshysynyń orynbasary óńirlerdiń ákimdikterine qaýipsizdikti qamtamasyz etý, sý basqan aımaqtardan adamdardy aldyn ala evakýatsııalaý jáne qutqarý jóninde qajetti sharalar qabyldaý týraly tıisti tapsyrmalar berdi.
