Jaǵajaılardyń basym bóligi talapqa saı emes - Vladımır Bekker
NUR-SULTAN. QazAqparat – Qazaqstanda resmı tirkelgen 607 jaǵajaı bar. Onyń tek 107-si ǵana kommýnaldyq menshikte, dep habarlaıdy QazAqparat tilshisi.
QR ІІM Tótenshe jaǵdaılar komıtetiniń tóraǵasy Vladımır Bekkerdiń aıtýynsha, elimizde 50 myńnan astam sýǵa shomylyp, balyq aýlaıtyn aýmaq bar. Solardyń negizinde 607 resmı jaǵajaı jasaqtalǵan.
«607 resmı jaǵajaıdyń tek 107-si ǵana kommýnaldyq meshikte. Qalǵany jeke menshiktiń ıeliginde. Al tótenshe jaǵdaı qyzmetiniń qutqarýshylary 607 jaǵajaıdyń tek 27-sin ǵana baqylaıdy. 113 stıhııaly jaǵajaıda 53 qutqarý postary ornatyldy. Onyń árqaısysynda 2-3 qutqarýshy, bir qaıyq bar. Jyl basynan beri 880 qutqarý jasaqshylaryn tegin daıyndadyq. Solardan jeke menshiktegi jaǵajaılar aýmaǵynda 335 qutqarý jasaǵy quryldy», - deıdi komıtet tóraǵasy.
Osyǵan qaramastan sýǵa ketkender sany byltyrǵydan asyp túsken. Vladımır Bekker shomylý maýsymy bastalǵaly beri 154 adamnyń ajaly sýdan bolǵanyn aıtady.
«Shomylý maýsymy bastalǵan kúnnen beri 154 adam sýǵa ketti. Onyń 58-i bala. 2018 jyly bul kezeńde 148 adam sýǵa ketken bolatyn. Bıyl sýǵa ketken 14 bala ata-aanasynyń qaraýynsyz qalǵan. Sonyń saldarynan olardyń ajaly aryq pen eleýsiz kólshikten kelgen. Meni bárinen buryn osy alańdatady», - dedi ol.
Aıta ketsek, Vladımır Bekker arnaıy brıfıngte ótken senbi men jeksenbide 22 adamnyń sýǵan ketkenin aıtqan bolatyn. Sondaı-aq, elimizdiń tórt oblysynda orman órtiniń joǵary klasy týyndap tur.
