Jaǵajaıda júrgenderge jaı tústi
NUR-SULTAN. QazAqparat – AQSh-tyń Florıda shtatyndaǵy jaǵajaıda segiz adam naızaǵaıdan japa shekti, dep habarlaıdy CNN telearnasy.
Telearnanyń habarlaýynsha, zardap shegýshilerdiń biri aýrýhanaǵa jetkizilgen sátte júregi soǵysy toqtaǵan, dárigerler naýqasty ómirge qaıtarýdyń bar amalyn qarastyryp baǵýda, qazir ol hal ústinde jatyr. Qalǵan jeteý jeńil jaraqat alǵan, úsheýi aýrýhanaǵa jatýdan bas tartqan.
Derekterge qaraǵanda, zardap shegýshilerdiń ekeýi – sheteldik týrıst. Olardyń qaı elden kelgendigi, ulty ázirge ashyp aıtylǵan joq. Al naızaǵaı soqqandardyń úsheýi – sýda serýendeıtin mototsıklderdi jalǵa beretin fırmanyń qyzmetkerleri.
