Jaǵajaı voleıbolynan ulttyq qurama Ispanııaǵa attandy
ALMATY. 5 naýryz. QazAqparat -Jaǵajaı voleıbolynan ulttyq qurama músheleri búgin Almatydan oqý-jattyǵý jıynyn ótkizý úshin Tenerıfke atandy.
Bas bapker Denıs Rovkın 29 naýryzǵa deıin Ispanııanyń Jaǵajaı voleıboly ortalyǵynda erler men áıelder quramasynyń 1-2 nómirli úzdikterin jańa maýsymǵa ázirlemek.
QR Voleıbol federatsııasynyń baspasóz qyzmetiniń habarlaýynsha, Halyqaralyq voleıbol federatsııasynyń (FIVB)kúntizbesinde bıyl «Álemdik týr» kezeńderiniń sany men halyqaralyq týrnırdi ótkizetin elderdiń aýqymy ótken jylǵa qaraǵanda aıtarlyqtaı ulǵaıyp otyr.
Jalpy Álemdik týr kezeńderi 2 dárejege jikteledi. Olar - júldesi men reıtıngtik upaılary qomaqty «Grand Slem» men Oren jarystary. Al, 1-7 shilde kúnderi Polshada ótetin Álem chempıonatyna qatysýshylar úshin «Grend Slem» kezeńderiniń reıtıngtik upaılary sheshýshi ról atqaratyn bolady. Qazir álemdik reıtıngte qazaqstandyqtardan Alekseı Sıdorenko men Aleksandr Dıachenko juby - 19-shy, Dmıtrıı ıAkovlev pen Alekseı Kýleshov - 63-shi, al Tatıana Mashkova men Irına Tsımbalova 38-shi satyda tur.
Olar óz kórsetkishterin 23-28 sáýirde Qytaıdyń Fýchjoý qalasynda ótetin Álemdik týrdyń Oren kezeńinde jaqsartýǵa kúsh salatyn bolady. Oǵan deıin 9-11 sáýir men 14-16 sáýirde Taılandta ótetin «KHANOM OPEN» jáne «SAMILA OPEN» Azııalyq týrlarynda, sondaı-aq 30 sáýir men 5 mamyr aralyǵynda Qytaıdyń Shanhzaı qalasynda bolatyn «Grand Slem» kezeńinde baqtaryn synap kórmek.
