Jaǵajaı voleıbolynan "Úlken dýlyǵa" álemdik týrynyń Máskeýdegi kezeńinde qazaqstandyq sportshylar 17-shi orynnan kórindi
ALMATY. Maýsymnyń 14-i. QazAqparat /Erlik Erjanuly/ - Jaǵajaı voleıbolynan "Úlken dýlyǵa" Álemdik týrynyń keshe Máskeýde ótken kezeńinde qazaqstandyq sportshylar 64 komandanyń arasynan 17-shi oryn aldy,
dep habarlaıdy QazAqparat QR Voleıbol federatsııasyna silteme jasap.
Maýsymnyń 9-y kúni bastalǵan bul baıraqty básekege álemdik reıtıngtik qorytyndy boıynsha úzdik 64 komanda qatysqan bolatyn. Onda el namysyn Aleksandr Dıachenko men Alekseı Sıdorenko qorǵady. Olar alǵashqy eki raýndta frantsııalyq (21:15, 18:21, 15:13) jáne qytaılyq sportshylardy (17:21, 21:18, 15:11) 2:1 esebimen utty. Sonyń nátıjesinde qazaqstandyqtar jarystyń negizgi kestesinde baq synaǵan 32 komandanyń qataryna enip, Azııa qurlyǵynan qatysqan 3 eldiń biri boldy. Alaıda bul saıysta olar álemdik reıtıngte 1-shi jáne 17-satyda turǵan AQSh pen Nıderlandy eliniń komandalaryna 2:0 esebimen ese jiberdi. Álemdik reıtıngte úzdik 64-tiń qatarynda eń sońǵylardyń biri bop turǵan Qazaqstan quramasy úshin Álemdik týr kezeńinde aldyńǵy 20-lyqqa ený úlken jetistik bolyp sanalady.
