Jaǵajaı voleıbolynan Olımpıada oıyndarynyń Shrı-Lankadaǵy dárejelik týrnırinde qazaqstandyq qyzdar úzdik nátıjege qol jetkizdi

Onda el namysyn erler arasynda - 2,  áıelder arasynda - 2 jup qorǵaǵan bolatyn. Áıelder arasyndaǵy saıysta qazaqstandyqtar aqtyq synda jarys qojaıyndarynae 3:1 esebimen basym tústi. Onda Qazaqstannyń 1-inshi komandasy (Tatıana Mashkova / Irına Tsımbalova) Shrı-Lankanyń 2-nshi komandasynan (S. Gýangsıngh / Nırosha Lakmını)  21:9, 21:14 esebimen jeńilis tapqan edi. Alaıda, Qazaqstannyń 2-nshi komandasy (Lıýbov Bogatý / Baqtygúl Samalyqova) Shrı-Lankanyń 1-inshi komandasynan (Tseılon T. Gýangsıngh / Nırosha Lakmını) 22:20, 21:19 esebimen basym túsip, esepti teńestire aldy. Odan keıingi jarys qojaıyndarynyń 1-inshi komandasyn Tatıana men Irına juby 10:21, 21:16, 19:17, al 2-inshi komandasyn Baqtygúl men Lıýbov juby 21:11, 21:23, 15:12 etip jeńip, qorytyndy esepti 3:1 esebimen óz paıdalaryna sheshti.

Erler arasyndaǵy básekede qazaqstandyqtar jartylaı fınalda jarys qojaıyndaryn 4:0 esebimen utqan bolatyn. Fınalda ırandyqtarǵa 2:3 esebimen ese jiberdi. Qazaqstannyń 1-inshi komandasy (Aleksandr Dıachenko / Alekseı Sıdorenko) Iranyń 2-inshi komandasynan (Sabır Hoshmand / Rýhollah Salehı)   basym tústi (21:17, 21:15). Al 2-nshi komandamyz (Alekseı Kýleshov / Dmıtrıı ıAkovlev) Irannyń 1-inshi komandasyna (Parvız Farýh/ Ag Mohammad Salah) ese jiberdi ( 18:21, 16:21). Odan keıin, eki eldiń úzdik juptary arasyndaǵy kezdesýde qazaqstandyqtardyń ( 25:23, 21:23, 18:16) mereıi ústem bolǵan edi. 2-nshi komandalar arasyndaǵy saıysta ırandyqtar (21:14, 21:14) esepti teńestirip ketti. Qosymsha 5-inshi kezdesý ótkizilip, onda Aleksandr Dıachenko men Alekseı Sıdorenko Parvız Farýhý men Ag Mohammadý Salahýdan 10:15 esebimen jeńilip qaldy. Osyǵan qaramastan olar Olımpıada joldamasynan áli úmit úzgen joq.  Endi dárejelik týrnırdiń aımaqtyq kelesi jarysynda óz baǵyn taǵy bir synap kórýge múmkindigi bar.