Jaǵajaı voleıbolynan áıelder týrnıri ótip jatyr
ALMATY. Maýsymnyń 21-i. QazAqparat /Erbol Turymbetov/ - Almaty oblysyndaǵy «Assortı Qapshaǵaı» jaǵajaıynda «Jaǵajaı hanshaıymdary» atty voleıboldan áıelder týrnıri ótip jatyr.
Týrnırdi QR Voleıbol odaǵynyń tehnıkalyq qoldaýymen «Qos qanat» qoǵamdyq birlestigi uıymdastyryp otyr. Demeýshisi «SWATCH» kompanııasy, aqparattyq demeýshi «Hıt TV» telearnasy. Al Bas demeýshi «KOTEX» saýda markasy. Sharanyń maqsaty elimizde kenje damyǵan sport túri - jaǵajaı voleıbolyn nasıhattaýǵa baǵyttalǵan. Ol úshin shara barysynda bilikti sportshy qyzdar arnaıy sheberlik sabaqtaryn ótkizetin bolady.
«Biz osy sharany uıymdastyra otyryp halyqtyń sportqa degen qyzyǵýshylyǵyn arttyrǵymyz keledi. Óziniń qarapaıym sharttylyǵymen jáne kórermenin qyzyqtyrǵyshtyǵymen erekshelenetin osy jaǵajaı voleıbolyn qyzyǵýshylar arasynda keńinen nasıhattaýdy kózdeımiz», dedi «Qos qanat» uıymynyń jetekshisi Denıs Lazarev.
Saıys ár aptanyń senbi kúnderi ótedi. Oǵan jalpy sany 12 komanda qatysady. Birinshi kúni 5 komanda ózara saıysta jeńimpazdaryn anyqtap úlgerdi. Shildeniń 3-i kúni jarystyń qorytyndysy shyǵyp, jeńimpaz juptar marapattalady. Marapattaý rásiminen soń «Mıss Bıkını» jaǵajaı konkýrsyn ótkizý josparlanǵan.
