Jaǵajaı voleıboly: qıyrshyq qumda - qyzý doda
ASTANA. 5 qarasha. QazAqparat - Qytaıda jaǵajaı voleıbolynan Azııa chempıonaty ótip jatyr.
Bizdiń elden atalmysh qurlyq birinshiligine úsh jup qatysýda, dep jazady «Alash aınasy» basylymy.
Bıylǵy Azııa chempıonatynda erler arasynda - 20 jup, al áıelder arasynda 13 dýet baq synaýda. Bir kóńil aýdararlyǵy, Haıkoýdaǵy (Qytaı) sary qurlyq birinshiliginde Qazaqstan voleıbolshylary úzdikter qataryna engen. Máselen, Alekseı Sıdorenko men Aleksandr Dıachenko erler arasyndaǵy birinshi nómirli, al Dmıtrıı ıAkovlev pen Alekseı Kýleshov úshinshi nómirli jup retinde tirkelgen. Al Tatıana Mashkova men Irına Tsımbalova áıelder arasyndaǵy Azııanyń tórtinshi juby retinde baq synaýda.
Árıne, Qazaqstan sportshylarynyń úzdikterdiń biri retinde tanylýy teginnen emes. Ótkenge úńiler bolsaq, 2010 jylǵy Azııa chempıonatynda Mashkova men Tsımbalova kúmis medal oljalasa, Sıdorenko/Dıachenko jáne ıAkovlev/Kýleshov juptary 4-5 oryndardy ıelengen. Al byltyr Sıdorenko men Dıachenko qola júldege ıe bolyp, ıAkovlev pen Kýleshov taǵy de besinshi orynǵa ıe bolǵan. Tek qyzdarymyzdyń joldary bolmaı, 9-oryndy qanaǵat tutqan bolatyn. Biraq Mashkova men Tsımbalova jaqynda Taılandta ótken álemdik týrdyń kezekti kezeńdik dodasynda 5-orynǵa ıe bolǵan-dy. Bir qyzyǵy, Azııa chempıonatyn uıymdastyrýshylar Qazaqstan qyzdarynan seskene me, barlyq komandalardy topqa bólgende, Mashkova men Tsımbalovany bir-eki oıyn artyq ótkizetindeı etip, «D» tobyna jiberipti.
Sonymen erler arasyndaǵy 20 jup bes komandadan tórt topqa bólingen. Al áıelder arasyndaǵy 13 jup tórt topqa jiktelgen. Osy tórt toptyń úsheýinde úsh komandadan da, tórtinshisinde - tórt jup.
Azııa chempıonatynyń alǵashqy kúni úsh jubymyz da barlyq oıyndaryn jeńispen aıaqtady. Bir kúnde eki kezdesýden ótkizgen qıyrshyq qum ústindegi voleıbolshylarymyz deńgeıleri ózderinen tómen qarsylastaryn asa qınalmaı utty. Ári úsh jubymyz da enshilerine eki jeńisten jazyp, shırek fınalǵa shyǵatyndaryna shúbá keltirmeı, óz toptarynda kósh bastady.
Sıdorenko men Dıachenko Jańa Zelandııa jáne Gonkong jigitterin 2:0 esebimen utsa, ıAkovlev pen Kýleshov Sıngapýr voleıbolshylaryn eki sette tizerletip, Jańa Zelandııanyń basqa bir komandasynan 2:1 esebimen basym tústi. Al Mashkova men Tsımbalova Sıngapýr jáne Gonkong qyzdaryna álimjettik jasap, ońdyrmaı jeńdi.
Biraq úsh jubymyz da alǵashqy oıyndaryn reıtıngteri boıynsha ekinshi ondyqtaǵy osaldaý komandalarmen kezdesti. Qazaqstan juptary úshin naǵyz tartysty oıyndar endi ótedi. Mysaly, endigi kezdesýlerin Sıdorenko men Dıachenko juby da, Mashkova men Tsımbalova dýeti de Qytaıdyń qarymdy komandalarymen ótkizedi.
