Jaǵajaı voleıbolshylary Álem chempıonatyna 3 joldama jeńip aldy
ALMATY. 20 mamyr. QazAqparat - 17-19 mamyr kúnderi jaǵajaı voleıbolynan Úndistannyń Chennaı qalasynda ótken Azııa chempıonatynda (U-21) qazaqstandyqtar 20-23 maýsymda Horvatııada ótetin Álem chempıonatyna 3 joldamany jeńip aldy.
Onda jarys qojaıyndarynan basqa Japonııa, Indonezııa, Avstralııa, Oman jáne Túrikmenstannan erler arasynda - 15, áıelder arasynda - 9 jup óner kórsetken bolady. Dúbirli dodanyń aqtyq synynda ındonezııalyqtarǵa ǵana ese jibergen Sergeı Bogatý men Vladıslav Pýstynnıkov (Qazaqstan-1) kúmis júldeger atandy. Azııa chempıondarynan jartylaı fınalda jeńilis tapqan Vıktor Pestov pen Kırıll Gýrın (Qazaqstan-2) qola júlde úshin bolǵan kezdesýde avstralııalyqtardyń da osal tusyn taba almaı, 4-shi oryndy qanaǵat tutty. Іrikteý synynda Japonııa quramasynyń kóshbasshylaryna jibergen esesin jartylaı fınalda da qaıtara almaǵan Baqtygúl Samalyqova men Lıýbov Bogatý qola júlde úshin bolǵan aqtyq synda ındonezııalyqtardan basym tústi.
Endi jigitter Álem chempıonatynyń aldynda, 6-9 maýsymda Polshada 23 jasqa deıingi sportshylar arasynda bolatyn álemdik birinshilikte óner kórsetpek.
