«Jaǵalaý kúzetinde» brakonerler quryqtaldy
ASTANA. 3 qazan. QazAqparat - Jyldyń kez-kelgen mezgiline qaramastan shekarany kúzetý boıynsha áskerı tapsyrmany qashanda múltiksiz atqarý QR UQK ShQ «Jaǵalaý kúzeti» óńirlik basqarmasynyń basty mindeti bolyp tabylady. Shekarany qorǵaýmen qatar, Kaspııdiń teńiz janýarlaryn, bekire tuqymdas balyqtardy zańsyz aýlap júrgenderge qarsy kúres júrgizý de shekarashylarǵa júktelgen abyroıly mindet.
Osy maqsatta kazaqstandyq shekarashylar reseılik áriptesterimen birlese otyryp, jylyna eki ret birikken jedel-saýyqtyrý is-sharasyn (BJSІ) ótkizýdi dástúrge aınaldyryp otyr.
Qazirgi tańda atalǵan is-sharanyń ekinshi kezeńi ótkizilýde, ıaǵnı, jaǵalaý kúzetiniń kemeleri men shekaralyq avıatsııasy Kaspııdiń qazaqstandyq bóligine kúsheıtilgen baqylaý júrgizip, nátıjesinde brakonerlerdiń júzý quraldaryn ustaýda.
Bir táýlik ishinde qazaqstandyq shekarashylar jyldamdyǵyna kóz ilespeıtin 4 «baıda» júzý kóligine mingen 11 shekara buzýshyny aýyzdyqtady.
Nátıjesinde, zańsyz júrgen balyqshylardan uzyndyǵy 5500 metr bolatyn balyq aýlaý quraldary, 62 dana bekire tuqymdas balyq (olardyń 59 óli kúıinde), sondaı-aq 1 tıýlen alyndy.
Júzý quraldarynyń barlyǵyn QR UQK Shekara qyzmetiniń Mı-8 tikushaǵy anyqtaǵandyǵyn erekshe atap ótken oryndy.
Shekarashylardyń toqtaý týraly talabyna qulaq aspaǵan brakonerlerdiń úlken jyldamdyqpen kórshiles memlekettiń aýmaǵyna qaraı zymyraı jóneldi. «Saqshy», «Egemen» atty shekara katerleri olardy qýyp jetip, toqtaýǵa májbúr etti.
Ustalǵandardyń jeke bastaryn aıǵaqtaıtyn kýálikteri, júzý quraldarynyń qujattary bolmaı shyqty. Aýyzsha aıtýlaryna qaraǵanda ózderi Reseı Federatsııasy, onyń ishinde Daǵystan Respýblıkasy men Astrahan oblysynyń turǵyndary bolyp shyqty.
Ustalǵandar Mańǵystaý oblysy Túpqaraǵan aýdanynyń Baýtıno eldimekenine jetkizildi. Jeke bastary anyqtalǵannan keıin olardy qylmystyq jáne ákimshilik jazaǵa tartý máseleleri qarastyrylatyn bolady, - dep habarlady QR UQK ShQ baspasóz qyzmetinen habarlady.
