«Jaǵalaý-3» turǵyn úı kesheniniń qurylysy ákimdiktiń jiti baqylaýynda - Á.Jaqsybekov
ASTANA. QazAqparat - «Jaǵalaý-3» turǵyn úı kesheniniń qurylysy ákimdiktiń jiti baqylaýynda. Bul týraly búgin eGov.kz saıtynda ótken onlaın-konferentsııada Astana ákimi Ádilbek Jaqsybekov málim etti.
«Jaǵalaý-3» turǵyn úı qurylysynyń keshiktirilýine qatysty úleskerlerdiń birinen túsken saýalda Á.Jaqsybekov aldymen úleskerlerdiń zańdyq múddelerin qala ákimdigi emes, sot sheshý kerektigin eske saldy.
«Astanadaǵy Beısekov pen Syǵanaq kósheleriniń boıyndaǵy «Kaontech International» JShS merdigerlik etýimen salynyp jatqan «Jaǵalaý-3» turǵyn úı kesheniniń qurylysyna qatysty aıtsaq. Qurylys júrgizýshi merdiger men úleskerler arasyndaǵy kelisimshart aıasyndaǵy qarym-qatynastar Qazaqstan Respýblıkasynyń azamattyq zańnamasymen retteledi, kelisimshart taraptardyń erkimen jáne óz múddeleriniń negizinde jasalady. Úleskerlerge aldyn ala kelisimshartta kórsetilgen talaptarmen, nysannyń paıdalanýǵa beriletin merzimderi men onyń ýaqyty qaı taraptyń uıǵarymymen shegeriletindigin qarap, muqııat tanysyp alý kerek. Sonymen birge paıdalanýǵa beriletin merzimniń shegerilýine qatysty habarlandyrýlar jasalady ma, joq pa ony da bilip alý shart. Úleskerler men qurylys salýshy arasyndaǵy quqyqtyq qatynastar kelisimsharttyń negizinde týyndaǵandyqtan, eger oryn alǵan daýdy sheshý múmkin bolmasa, taraptar kelisimshartta kórsetilgen talaptar oryndalmaýyna qatysty azamattyq sotqa júginýleri tıis. Kelisilgen mindettemeler oryndalmaǵan bolsa, úleskerler Qazaqstan Respýblıkasynyń azamattyq kodeksine saı sotqa bere alady», - deıdi Á.Jaqsybekov.
Ákimniń aıtýynsha, bul úleskerlerdiń óz qatesinen oryn alǵan daýly másele bolǵanymen, ákimdik azamattardyń múddesin oılap, tasada qalmaýdy sheshken jáne quqyq qorǵaý organdarynyń qatysýymen arnaıy vedomstvoaralyq komıssııa qurǵan.
«Aıta ketý kerek, «Jaǵalaý-3» turǵyn úı kesheniniń qurylysyn aıaqtaý jónindegi saýal apta saıyn Astana qalasynyń ákimdigi janyndaǵy turǵyn úı qurylysyndaǵy úleskerlik qatysý máseleleri boıynsha vedomstvoaralyq komıssııada qaralady. Bul másele ákimdiktiń jiti baqylaýynda tur», - dep atap ótti ákim.
