Jadyra Dáribaeva: Mundaı qaıǵy endi qaıtyp bolmasyn
NUR-SULTAN. QazAqparat - Búgin jalpyulttyq aza tutý kúni. Osyǵan qaraı aqyn, «Qurmet» ordeniniń ıegeri Jadyra Dáribaeva koronavırýs ınfektsııasynan qaza bolǵandardyń jaqyndaryna kóńil aıtty, dep habarlaıdy QazAqparat tilshisi.
«Bul indet óte qıyn boldy. Aýyl-aımaqtaǵylar habarlasyp, kómek surap jatyr. Olardyń shyryldaǵan úni, janaıqaıy Úkimetke jetip, sharalar qabyldanyp jatyr. Dárigerler tapshylyǵy bar, biraq bar shama-sharqy jetkenshe kúresýde. Degenmen bári baıaý júrip jatyr, sondyqtan bılik tarapynan úlken shara qoldaný kerek», - deıdi aqyn Jadyra Dáribaeva.
Ol bul indet jastardyń da ómirin qıyp jatqanyn aıtty.
«Onsyz da sany az qazaqstandyqtardyń indet saldarynan ómirden ozyp jatqany júregimizdi aýyrtady. Eń qıyny - 40-50 jastaǵy adamdar da dertti jeńe almaı, ajal qushýda. Qaza tapqandardyń jany jánnatta bolyp, aldynan jarylqasyn. Olardyń týǵan-týystaryna qaıǵyra kóńil aıtamyn. Mundaı qaıǵy endi qaıtyp bolmasyn dep tileımin», - deıdi ol.
