«Jádigerler sherýi»: Qaraǵandy tarıhı-ólketaný murajaıynda kórme ashyldy
QARAǴANDY. QazAqparat – Qaraǵandy oblystyq tarıhı-ólketaný murajaıynda «Jádigerler sherýi» atty jańa joba iske qosyldy. Jyl boıy aı saıyn kelýshilerdiń nazaryna taqyryptyq kollektsııalar usynylady. Joba murajaıdyń 90 jyldyǵyna arnalǵan, dep habarlaıdy QazAqparat tilshisi.
«Jádigerler sherýi» Saryarqanyń baı tarıhı-mádenı murasyn kórsetedi. Bul jobanyń ereksheligi – murajaıǵa kelýshiler qoldarymen ustap, kórmeniń sırek kezdesetin eksponattarymen sýretke túse alady. Aı saıyn Facebook, Instagram, Telegram áleýmettik jelilerinde murajaı kollektsııasy týraly beıne sholýlar jarııalanady», – dep habarlady murajaı.
Osy aıda áskerı qural-jabdyqtar tanystyryldy. Ekspozıtsııada sýyq qarýdyń toǵyz túri usynylǵan: temir dáýirindegi akınak, jańa sherikterdiń qylyshy, qazaq qyshy, orta ǵasyr jáne Japon azamat soǵysy kezindegi qylysh, shashka jáne basqalary. Jınaq HH ǵasyrdyń 70-shi jyldary qalyptasqan. Negizinen qala men oblys turǵyndary revolıýtsııaǵa deıingi kezeńdegi úılerdi taldaý kezinde en daladan tapqan kezdeısoq oljalaryn murajaıǵa alyp kelgen.
Naýryzda kórermender turmystyq zattarmen tanysa alady: syrmaqtar, tekemetter, «Zınger» tigin mashınalary, 1900 jyly shyqqan samaýryndar. Sáýir ǵaryshqa arnalǵan. Mamyr aıynda kórme soǵys jyldaryndaǵy hattardan, kúndelikterden, armııa jabdyqtarynan, marapattardan turady. Maýsym aıynda murajaı qonaqtary HH ǵasyrdyń 40–80 jyldaryndaǵy oıynshyqtar kollektsııasyn kóredi. Shilde aıynda – mýzykalyq aspaptar. Tamyz aıynda – oblys aýmaǵynan tabylǵan arheologııalyq artefaktiler. Qyrkúıek aıynda – sırek kitaptar, Quran, dastandar jáne t. b. Qazan aıynda kórmede Qaraǵandynyń uzaq ómir súrgen áıeli Sahan Dosova týraly materıaldar qamtylady. Ejelgi monetalar kórmesi qarasha aıynda bolady. Jeltoqsan aıynda «Súıikti murajaıǵa syılyq» aktsııasy boıynsha jyl boıy jınalǵan eksponattar kórmesi jyldy aıaqtaıdy.
