Jabylǵan 8 banktiń salymshylaryna depozıtindegi aqshasyn qaıtarý aıaqtaldy
Atalǵan merzimge deıin talap etilmegen kepildi ótem somalary salymshylardyń Biryńǵaı jınaqtaýshy zeınetaqy qorynda ashylǵan jeke zeınetaqy shottaryna erikti zeınetaqy jarnasy retinde aýdarylady.
QR zańnama talaptaryna sáıkes, ótem somasyn aýdarý tólem merzimi aıaqtalǵan kúnnen bastap, kúntizbelik 30 kún ishinde, ıaǵnı 2022 jyldyń 31 mamyryna deıin júzege asyrylady.
Zeınetaqy qoryna «Valıýt-Tranzıt Bank» AQ, «Qazınvestbank» AQ, «Delta Bank» AQ, «Qazaqstan Eksımbanki» AQ, «Qazaq Banki» AQ, «Astana Banki» AQ, «Tengri Bank» AQ jáne «AsiaCredit Bank (AzııaKredıt Bank)» AQ salymshylarynyń ótem somalary aýdarylady.
Bul salymshylar úshin ótem somasynyń BJZQ-ǵa aýdarylýy jaıynda ýaıymdaýdyń esh qajeti joq – bank klıentterine atalmysh rásim boıynsha qosymsha aqparat beriledi.
Depozıtorlar ótem aqshalarynyń zeınetaqy shottaryna eseptelgendigin aǵymdaǵy jyldyń 31 mamyrynan keıin BJZQ resmı saıtyndaǵy jeke kabıneti, mobıldi qosymshasy jáne qordyń jergilikti keńsesine barý arqyly óz betimen kóz jetkize alady.
Sondaı-aq bul aqparatty «elektrondyq úkimet» portaly nemese QDKBQ-ǵa tikeleı júginý arqyly alýǵa bolady.
Sonymen qatar tólem merzimi aıaqtalǵan soń da, onyń ishinde talap etilmegen ótem somasy BJZQ-ǵa aýdarylǵan jaǵdaıda da zańnama júzinde salymshy úshin ózine tıesili ótem somasyn alýǵa ótinish berý múmkindigi qarastyrylǵan.
Salymshy ótinishpen qatar tólem merzimi barysynda ótinish berýge kedergi keltirgen myna mán-jaıdyń biri bolǵanyn rastaıtyn qujatty qosa usynady: depozıtordyń áskerı qyzmetke kirýi, QR sheginen tys jerde nemese bas bostandyǵynan aıyrý oryndarynda bolýy.
Salymshynyń mura qabyldaýy, mura ashý jáne ony qabyldaýǵa qatysty basqa da sebepter, sondaı-aq sot anyqtaǵan ózge de mán-jaı da osyǵan jatady.
