Jabyq jolda polıtseılerge qarsylyq kórsetken júrgizýshi ákimshilik qamaýǵa alyndy
QARAǴANDY. QazAqparat - Qaraǵandylyq polıtseılerdiń zańdy talabyna baǵynbaı, aýa raıyna baılanysty jabylǵan jolǵa shyǵyp ketken júrgizýshi sot sheshimimen ákimshilik qamaýǵa alyndy, dep habarlaıdy QazAqparat Polisia.kz-ke silteme jasap.
Qaraǵandy oblystyq PD Balqash qalalyq polıtsııa bóliminiń qyzmetkerleri zańdy talapqa baǵynbaı, tártip saqshylarynyń jumysyna kedergi keltirgen 31 jastaǵy elorda turǵynyn anyqtady. Oqıǵa aýa raıynyń qolaısyzdyǵyna baılanysty Almaty – Ekaterınbýrg tas jolynyń jabylǵan kezinde bolǵan.
Júrgizýshige qatysty Qazaqstan Respýblıkasy Ákimshilik quqyq buzýshylyq týraly kodeksiniń 667-babynyń 1-bóligine sáıkes hattama toltyryldy. Ákimshilik materıal onyń turǵylyqty mekenjaıy boıynsha sottyń qaraýyna jiberildi.
13 qańtar kúni Astana qalalyq mamandandyrylǵan aýdanaralyq ákimshilik sottyń sheshimimen azamat ákimshilik qamaýǵa alyndy.
Foto: polisia.kz
