Jabyq saıabaq: SQO ákimi áleýmettik jelidegi pikirge jaýap berdi
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov Petropavl qalasyndaǵy Qazaq drama teatrynyń janyndaǵy saıabaqtyń jabyq bolýyna qatysty jaıtqa pikir bildirdi, dep habarlaıdy QazAqparat tilshisi.
Osydan birneshe kún buryn áleýmettik jeli qoldanýshylarynyń biri teatr janyndaǵy úlken saıabaqtyń qala turǵyndary úshin jabyq turǵandyǵyna narazylyq tanytqan bolatyn. Osyǵan oraı óńir basshysy Facebook paraqshasynda jazba qaldyrdy.
«Jaqynda áleýmettik jelilerde qala turǵynynyń S.Muqanov atyndaǵy qazaq teatrynyń janyndaǵy saıabaq halyqqa qol jetimdi emes degen úndeýi boldy. Men bul usynysty qoldaımyn. Qorshaýlar buzyldy, búgin biz senbilik ótkizdik. Bıyl bul alań jóndelip, turǵyndar úshin jaqsy demalys ornyna aınalady. Jalpy biz saıabaqtardy jańartý boıynsha keshendi jumystar júrgizip jatyrmyz», - dedi óńir basshysy.
Onyń atap ótýinshe, ótken jyly 5 jańa saıabaq salyndy. Bıyl 7 saıabaq ashylady. Brýsılovskıı kóshesindegi saıabaq uzartylady. Jýkov kóshesinde ádemi alleıa jasalady.
«Qýyrshaq teatrynyń janynda balalarǵa arnalǵan saıabaq quramyz. Jańa qazaq teatrynyń janynda jáne Altynsarın kóshesinde de jańa saıabaq paıda bolady. Bıyl abattandyrý jumystary da jalǵasady. Tórt jylda 386 aýla jóndeldi, bıyl taǵy 82 aýla ózgeredi. Byltyr 45 tegin avtoturaq isteldi, bıyl taǵy 47 turaq jasaımyz»,- dedi Qumar Aqsaqalov.
