Jabyq keshendegi Azııa chempıonaty: El qorjynyna altynshy altyn tústi
ASTANA. QazAqparat - Tegeranda ótip jatqan jabyq keshendegi Azııa chempıonatynyń ekinshi kúninde erler arasynda almatylyq syryqpen sekirýshi Nıkıta Fılıppov el qorjynyna altynshy altyndy saldy, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Fılıppovpen birge syryqpen sekirýden taǵy bir otandasymyz Danııl Polıanskıı óner kórsetti.
Nıkıta jarys jolyna sońǵy bolyp shyqty. Óıtkeni ol alǵashqy múmkindiginde-aq 5.20 metrge tapsyrys bergen. Al Polıanskıı jarysty 5 metrmen bastady. Biraq bul bıiktikti Danııl ekinshi múmkindiginde baǵyndyrdy. Kýveıtten kelgen Alı Alsobaghah 5 metrdi birinshi talpysynda-aq eńserdi. Sonyń saldarynan Polıanskıı jarysty tórtinshi orynmen aıaqtady. Keıinnen jerlesimiz 5.20 metrge tapsyrys bergenimen, joly bolǵan joq.
26 jastaǵy Fılıppov birden 5.20 metrge sekirip, chempıon atandy. Iran sportshysy Mohammad Banıadamnyń da kórsetkishi dál osyndaı. Biraq ol ekinshi múmkindiginde baǵyndyrǵandyqtan, kúmis júldeni qanaǵat tutty.
Nıkıta 5.40 metrge umytylyp kórgenimen, bul joly sáttilik joldas bolmady. Bastysy, bas júldege qajetti nátıjeni kórsetti.
Jabyq keshendegi Azııa chempıonaty. 2 aqpan. Syryqpen sekirý, erler:
1. Nıkıta Fılıppov (Qazaqstan) - 5.20 metr
2. Mohammad Banıadam (Iran) - 5.20
3. Alı Alsobaghah (Kýveıt) - 5.20
4. Danııl Polıanskıı (Qazaqstan) - 5.20.
