Jabyq keshendegi Azııa chempıonaty: 23 el ózara myqtyny anyqtaıdy
ASTANA. QazAqparat - Iran astanasy Tegeran qalasynda ótetin jabyq keshendegi Azııa chempıonatyna 23 eldiń jeńil atletteri qatysady, dep habarlaıdy QazAqparat QR Jeńil atletıka federtsııasynyń resmı saıtyna silteme jasap.
Azııa chempıonaty 1-3 aqpan aralyǵynda ótedi. Aldyn-ala málimet boıynsha jarysqa 300-den astam sportshy kelýi tıis. Olar sary qurlyqtyń 23 eliniń namysyn qorǵaıdy.
Sarapshylardyń pikirinshe, keıbir memleketter Tegerandaǵy sońǵy saıası jaǵdaılarǵa baılanysty qatysýdan bas tartqan.
Qazaqstan quramasy bul jarysqa 25 sportshyny aparady. Sportshylardyń sany jóninen Qazaqstan kóshbasshylardyń qatarynda. Iran jeńil atletıka federatsııasynyń vıtse-prezıdenti Parısa Behzadı jarys qojaıyndary sapynan 29 sportshy óner kórsetedi dep habarlady.
Jalpy, jabyq keshendegi Azııa chempıonatynda 26 saıys túri boıynsha medaldar jıyntyǵy sarapqa salynady. Naqtyraq aıtsaq, erler 13, áıelder 13 saıys túrinen synǵa túsedi.
60, 400, 800, 1500, 3000 metrge júgirý, 60 metrge tosqaýyldar arqyly júgirý, 4h400 metrlik estafeta, syryqpen sekirý, úsh qarǵyp sekirý, bıiktikke sekirý, uzyndyqqa sekirý, ıadro serpý, kópsaıys (erlerde - jetisaıys, áıelderde -bessaıys).
Jabyq keshendegi Azııa chempıonatynyń tarıhy 2004 jyldan bastaý alady. Tegeranda buǵan deıin atalǵan jarys eki ret ótkizilgen. Bul joly da qurlyq birinshiligin «Aftab Engelab» sport kesheni qabyldaıdy.
