Jabyq qalashyqtardaǵy áskerıler baspanamen qalaı qamtamasyz etiledi
ASTANA. QazAqparat - Jabyq áskerı qalashyqtar men zastavalarda turatyn áskerı qyzmetshilerdi baspanamen qamtamasyz etý máselesi sheshiledi.
Bul týraly Parlament Májilisiniń jalpy otyrysynda QR Qorǵanys mınıstriniń orynbasary Talǵat Muhtarov málim etti, dep habarlaıdy QazAqparat.
«Taǵy bir mańyzdy jańa normaǵa toqtalsaq, bul másele jabyq áskerı qalashyqtar men zastavalarda ornalasqandyqtan, jekeshelendirýge jatpaıtyn qyzmettik baspanamen qamtamasyz etilgen áskerı qyzmetshilerge qatysty. Zań jobasy boıynsha olarǵa sol óńirge tıesili turǵyn úı tólemderi aı saıyn 50 paıyzdyq kólemde aýdarylatyn bolady. Bul óz kezeginde ádiletti bolyp tabylady, sebebi memleket atalǵan áskerılerdi tegin qyzmettik baspanamen qamtamasyz etedi, olardyń kommýnaldyq tólemderin de tolyqtaı memleket kóteredi. Sondyqtan áskerı qyzmetshiniń munyń syrtynda memleket beretin 50 paıyz somasyndaǵy turǵyn úı tólemderin jınaqtap, bankterdiń ıpotekalyq nesıelendirý baǵdarlamalaryna qatysýǵa múmkindigi bar»,-dedi Talǵat Muhtarov «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn boıynsha baıandamasynda.
Budan buryn habarlanǵandaı , Zań jobasymen qandaı da bir turǵyn úı berilmesten, qyzmetten shyǵarylǵan áskerı zeınetkerlerge birjolǵy aqshalaı ótemaqyny aldaǵy 2018 jyly berý kózdelgen, ıaǵnı olardyń turǵyn úıge degen quqyǵy tolyq iske asyrylady. Munymen qosa, áskerı qalashyqtarda turyp jatqan zeınetkerlerge de birjolǵy ashqalaı ótemaqy tóleý qarastyrylǵan.
Sonymen qatar qaza tapqan áskerı qyzmetshilerdiń otbasylarynyń baspanasyzdyq máselesi sheshiledi .
