Jábirlenýshige aqsha aýdarǵan azamatqa qatysty is toqtatyldy
ASTANA. KAZINFORM — Elorda turǵyny sot aktisin oryndaý maqsatynda jábirlenýshiniń bank derektemelerin paıdalanyp aqsha aýdarǵany úshin «derbes derekterdi zańsyz jınaý» baby boıynsha sottalǵan edi. Alaıda kassatsııalyq sot bul derektemelerdiń jeke nemese otbasylyq qupııany quraıtyn málimet emes ekenin jáne jábirlenýshige eleýli zııan keltirilmegenin anyqtap, isti qylmystyq quramnyń bolmaýyna baılanysty toqtatty. Bul týraly Prokýratýra málim etti.
— Elorda turǵyny ókildik shyǵyndardy óndirý týraly sot aktilerin oryndaý maqsatynda jábirlenýshige aqsha qarajatyn aýdarǵan. Ol úshin onyń bank rekvızıtterin paıdalanǵan. Bul áreketter sot sheshimin oryndaýǵa jáne jábirlenýshiniń paıdasyna aqsha aýdarýǵa baǵyttalǵan. Alaıda keıin bul derektemelerdi alǵany qylmystyq quqyq buzýshylyq retinde tanyldy, — delingen habarlamada.
Birinshi jáne apellıatsııalyq satydaǵy sottar ony derbes derekterdi zańsyz jınaǵany úshin kináli dep tanyp, aıyppul taǵaıyndaǵan.
Kassatsııalyq satyda prokýror onyń áreketterinde osy qylmystyq quqyq buzýshylyq quramynyń mindetti belgisi –jábirlenýshiniń quqyqtary men zańdy múddelerine eleýli zııan keltirý joq ekenin kórsetti.
— Kassatsııalyq sot prokýrordyń qorytyndysymen kelisip, bank derektemeleri derbes derekterge jatatynyn, alaıda ózdiginen jeke nemese otbasylyq qupııany quraıtyn jeke ómirge qatysty málimetter bolyp sanalmaıtynyn anyqtady, — dep habarlady quzyrly organnan.
Sonymen qatar is boıynsha jábirlenýshige eleýli zııan keltirilgeni dáleldenbegen. Kerisinshe, bank derektemeleri sot aktilerin oryndaý úshin onyń paıdasyna aqsha aýdarýǵa paıdalanylǵan.
Nátıjesinde sot aktileriniń kúshi kassatsııalyq sotpen joıylyp, árekette qylmystyq quqyq buzýshylyq quramynyń bolmaýyna baılanysty is toqtatyldy.
Buǵan deıin patrondy saqtaǵany úshin sottalǵan azamatqa qatysty is toqtatyldy.
