Jábirlenýshi: Perızat Qaırat áreketi úshin jaýap berýi tıis

ASTANA. KAZINFORM – Astanada qoǵam belsendisi Perızat Qaırat pen onyń anasy Ǵaını Alashbaevaǵa qatysty qylmystyq is boıynsha taraptardyń jaryssózi ótti.

- Medıa keńistikte anasy men qyzynyń bul áreketin beldemshe kıgen Ostap Bendermen nemese alaıaqtar patshaıymy atanǵan Sofıa Blıývshteınmen (laqap aty - Sonka Altynqol) salystyryp jatyr. Bul adamdardyń sýbektıvti pikiri. Biz prokýrordyń pikirin tyńdadyq. Shynynda da, atalǵan baptar boıynsha zań buzylyp, qylmys jasalǵany rastalyp otyr. Sizderden qatań shara qoldanýdy suraımyn, - dedi jábirlenýshiniń ókili, «Stroıkonstrýktsııa» AQ-nyń zań keńesshisi Ǵalııa Isaeva sotta.

Sondaı-aq jábir kórýshiniń ókili Perızat Qaırattyń isinen 45-ten astam adam zardap shekkenin aıtty.

- Biz azamattyq talabymyzdy tolyq qoldaımyz. Aıyptalýshylarǵa qatysty qatań shara qoldanýdy suraımyz jáne 200 mıllıon teńgeni tolyq óndirýdi talap etemiz. Adamdar óz áreketi úshin jaýap berýi tıis. 2024 jyly búkil el jańalyqtan «Biz Birgemiz Qazaqstan 2030» qorynyń tasqynnan zardap shekkenderge kómektesip jatqanyn baqylap otyrdy. Biraq, búginde barlyq buqaralyq aqparat quralynda qarajattyń maqsatsyz jumsalǵany aıtylyp jatyr. Aıyptaýlardy tolyq qoldaımyn. Qylmystyq jaýapkershilikke tartyp, qatań jaza qoldanýdy suraımyn,- deıdi ol.

Buǵan deıin kýáger Perızat Qaırattyń anasy Ǵaını Alashbaevany densaýlyǵyna baılanysty úıqamaqta qaldyrýdy suraǵan edi. 

Aıta keteıik, prokýror Perızat Qaıratty 10 jyl, anasyn 8 jyl bas bostandyǵynan aıyrýdy surady.  Sondaı-aq keshe sot otyrysynda Perızat Qaırat sotynda prokýror málimdeme jasady. 

Eske salaıyq, Perızat Qaırat isi boıynsha 47 adam jábirlenýshi dep tanyldy.