Jábirlenýshilerge ótemaqy tóleý jónindegi quqyqtyq normalar bir júıege keltirilmek
ASTANA. QazAqparat - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Jábirlenýshilerge zııandy óteý qory qyzmetiniń máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy birinshi oqylymda maquldandy.
«Zań jobasynda «Jábirlenýshilerge zııandy óteý qory týraly» Qazaqstan Respýblıkasy Zańynyń jobasymen úılestirý bóliginde Bıýdjet jáne Qylmystyq-protsestik kodeksterine ózgerister men tolyqtyrýlar engizý kózdelgen. Bıýdjet kodeksine birqatar túzetýler engizý eskerilgen. Qordyń jumys tetigin Qazynashylyqta baqylaý shotyn ashý arqyly iske asyrý usynylady. Bul Qordy ustaýǵa qosymsha shyǵys shyǵarmaýǵa múmkindik beredi. Qazynashylyq júıesinde ashylǵan memlekettik mekemeler, kvazımemlekettik sektor sýbektiler, Ulttyq qor men basqa da qazir jumys isteıtin 9 baqylaý shoty ýaqytyly túsimderdi esepke alýǵa jáne tólemderdi júrgizýge múmkindik beredi. «Jábirlenýshilerge zııandy óteý qory týraly» Zań jobasynda Qorǵa túsetin túsimderdiń kózderi qarastyrylǵan, sondyqtan Qazynashylyqta atqarylýy úshin bul normalar Bıýdjet kodeksinde de kózdeledi», - dedi Qarjy mınıstri B. Sultanov atalǵan zań jobasy boıynsha baıandamasynda.
Onyń sózine qaraǵanda, jábirlenýshilerge tólemderdi turaqty tólep turý úshin shotqa ınkassolyq ókimder qoıýdy jáne qarajatty bıýdjetke alyp qoıýdy nemese aýdarýdy shekteıtin normalar engiziledi.
«Qylmystyq-protsestik kodekske keltirilgen zııan úshin eń az aqshalaı ótemaqy alýǵa jábirlenýshiniń quqyqtaryn túsindirý bóliginde túzetýler engizý usynylady. Sol sııaqty buryn tólengen ótemaqy somasyn Qordyń paıdasyna qaıtarý jóninde aıyptalýshyǵa regresstik talap qoıýdy sot úkimine mindetti túrde engizý týraly norma kózdelip otyr. Zań jobasyn qabyldaý qylmystyq quqyq buzýshylyqtardan jábirlenýshilerge aqshalaı ótemaqy tóleý jónindegi quqyqtyq normalardy zańnamalyq bir júıege keltirýge múmkindik beredi»,-dedi mınıstr.
