Jabylmaǵan geshtalt adamnyń psıhıkasyna qalaı áser etedi – psıholog keńesi

ASTANA. KAZINFORM – Geshtalt jabylmasa – kúızeliske ákelýi múmkin. Bul týraly «Búgin LIVE» stýdııasyna qonaq bolǵan psıholog maman tolyǵyraq tarqatty. 

Keıingi kezde «Jabylmaǵan geshtalt» degen tirkesti jıi estıtin boldyq. Ásirese koých, psıholog mamandar bul termındi jıi qoldanady. Geshtalt terapevti eń áýeli «geshtalt» degen sózdiń anyqtamasyna toqtaldy.

– Árbir tájirıbeli psıholog adamdarmen jumys istegende jeke ádisin qoldanady. Solardyń biri – geshtalt terapııa. Bul – psıhoterapııalyq baǵyttardyń biri. Osy baǵytty meńgergen mamandar ózderin geshtalt terapevt dep ataıdy. Geshtalt degenimiz – aıaqtalmaı turǵan qajettilik. Adam boıynda paıda bolǵan nıet ne talpynys belgili bir áreketpen júzege aspaı, jabylmaı qalsa, ol adam psıhıkasyna áser etýi múmkin, - deıdi Gúlzat Asanova.

Kópshiliktiń kókeıinde bul termın oryndalmaǵan arman degen túsinikpen assotsıatsııalanady. Al maman arman men geshtaltty shatastyrmaý kerektigin aıtady.

– Arman – bul jaı ǵana nıet nemese qııal. Biraq ol áreketpen naqty qadamdarǵa aınalmasa, geshtalt bolyp sanalmaıdy. Armandy geshtaltqa aınaldyrý úshin oǵan baǵyttalǵan naqty áreket kerek. Sol arqyly adam óziniń ishki qajettiligin ótep, ony jaba alady. Áıtpese, ol jaı ǵana fantazııa kúıinde qalady. Geshtalt mindetti túrde úlken maqsat bolmaýy múmkin. Kúndelikti ómirimizdegi maıda-shúıde áreketterdiń ózi geshtaltqa jatady. Mysaly, tańǵy asty ishý, bireýge qońyraý shalý, keshke serýenge shyǵý – bulardyń barlyǵy belgili bir qajettilikti ótep, geshtaltty jabady, - deıdi psıholog.

Al geshtalt jabylmaı qalsa, ókinish sezimin týdyrýy múmkin. Maman sáıkesinshe, jabylmaǵan geshtalttardyń kóbeıýi psıhologııaǵa keri áser etetinin jetkizdi.

– Adamnyń boıynda birneshe bazalyq qajettilik bolady. Sol qajettilikter ýaqytyly ótelmeı, geshtalttar jabylmaı qalsa, ol adamdy ishki kúızeliske, júıkeniń tozýyna ákelýi múmkin. Sebebi, olar bir-birine qarama-qaıshy kelip, ishki konflıkt týdyrady. Mysaly, adam «úı alý kerek» dep oılasa, biraq sonymen qatar «kólik kerek» degen oıy da bolsa, bul eki nıet bir-birine qaıshy kelip, ishki shıelenis týdyrýy múmkin, - deıdi maman.

Gúlzat Asanovanyń aıtýynsha, keıde ata-analar óziniń jaba almaǵan geshtaltyn balalary arqyly oryndaýǵa tyrysady eken.

– Barlyq ata-ana óz qajettiligi men balanyń qajettiligin ajyrata bilýi kerek. Keıde ata-ana balaǵa óz armandaryn telıdi. Mysaly, anasy kezinde chempıon bolýdy armandap, endi balasyn júzýge nemese sportqa kúshtep beredi. Bul – óziniń jabylmaǵan geshtaltyn balaǵa júkteý. Mundaıda bala óziniń emes, ata-ananyń armany úshin ómir súredi. Maǵan kóptegen qyz-kelinshekter psıhologııalyq sabaqtarǵa keledi. Sol kezde ózderiniń geshtalttaryn anyqtap, «biz balalarymyzǵa ózimizdikin ilip júrgen ekenbiz ǵoı» degen túsinikke keledi. Osydan keıin olar balalaryna múlde basqa kózqaraspen qaraı bastaıdy, - deıdi ol.

Eske sala keteıik, ótken joly emotsııany ishte saqtap, tunshyqtyrý aýrýǵa ákeletinin jazǵan edik.