«Jabylyp óltirgen»: Qyzylordada marqumnyń týystary 12 adamnyń qatysyn tekserýdi talap etti

Qaıǵyly jaǵdaı týraly aqparat áleýmettik jelide keń taraldy. 

— Bul jazbany kózime jas alyp, sózben jetkizý múmkin emes jan kúızelisimen jazyp otyrmyn. Meniń týǵan inimdi óltirip ketti. Onyń ómiri qatygezdikpen qıyldy. Al bizdiń otbasymyz áli kúnge deıin bul aýyr qazaǵa kóndige almaı keledi. Bizge belgili aqparat boıynsha shabýylǵa 12 adam qatysqan. Іnime toptasyp soqqy jasaǵan. Soqqy júrek tusyna tıgen. Alaıda qazirgi ýaqytta tek úsh adam ustalǵan, — delingen Threads áleýmettik jelisindegi jazbada.

Bul jáıtke qatysty Qyzylorda oblystyq polıtsııa departamenti resmı málimdeme jasady.

— 8 qazanda Qyzylorda qalasynyń turǵynyn óltirý deregi boıynsha qylmystyq is qozǵaldy. Atalǵan oqıǵa boıynsha úsh kúdikti ustalyp, ýaqytsha ustaý ızolıatoryna qamaldy, — delingen habarlamada.

Marqumnyń jaqyndary jigitti tek úsh adam urǵanyna kúmánmen qaraıdy. Óıtkeni, olardyń aıtýynsha, shabýyldy 12 adamnan quralǵan top jasaǵanyn kýágerler aıtyp bere alady.

— Eger kýágerler shabýylǵa qatysqandardyń sany budan áldeqaıda kóp ekenin aıtsa, nege tek úsh adam ustalǵan? Men 12 adamnyń bári birdeı dárejede kináli dep otyrǵan joqpyn. Biraq árqaısysynyń bul oqıǵadaǵy róli muqııat tekserilip, kýágerlerdiń sózderi eskerilip, osy aýyr qylmysqa qatysy bar birde-bir adamnyń tergeý nazarynan tys qalmaýyn talap etemin, — dep jazdy marqumnyń ápkesi.

Polıtsııa da bul nusqany qarastyryp jatqanyn atap ótti.

— Tárkilengen barlyq beınejazba zerdelendi, Oqıǵaǵa ózge de tulǵalardyń qatysy bolýy múmkin ekeni tekserilip jatyr. Árbir qatysýshynyń róli men qatysý dárejesine tergeý qorytyndysy boıynsha quqyqtyq baǵa beriledi, — delingen habarlamada.

Departament basshylyǵy tergeý múddesine baılanysty ózge aqparat jarııa etilmeıtinin, tergeý barysy erekshe baqylaýda ekenin málimdedi.

Eske salaıyq, buǵan deıin Qyzylorda qalasynda jasóspirimder arasyndaǵy janjal biriniń ólimimen aıaqtaldy.