Jabyq turady: Almatyda ótkelderdegi lıftini qoldaný máselesi qalaı sheshiledi

ALMATY. KAZINFORM – Almatyda erekshe qajettilikteri bar adamdarǵa jerústi ótkelderindegi lıftini qoldaný jıi qıyndyq týdyrady.

Jaıaý júrginshilerge arnalǵan kópirlerdegi lıftter kóbinese jumys istemeıdi nemese jabyq bolady. Bul jaǵdaıǵa baılanysty turǵyndar áleýmettik jelilerde shaǵym bildirip jatyr.

Almaty qalasynyń jumyspen qamtý jáne áleýmettik baǵdarlamalar basqarmasynyń dereginshe, qalada 78 jerústi jaıaý júrginshiler ótkeli bar. Olardyń ishinde 43 ótkel lıftpen, 16 ótkel eńis kótergish mehanızmderimen, al 51 ótkel pandýstarmen qamtamasyz etilgen. Bul ınfraqurylymnyń qoljetimdiligi máselesi qoǵamdyq kólik pen jaıaý júrginshilerdiń qaýipsizdigine áser etedi.

– 12 jerústi ótkelinde kótergish qurylǵylar barlyǵyna qoljetimdi rejımde jumys isteıdi. Qalǵan ótkelderde qoljetimdilik magnıtti kiltter arqyly júzege asyrylady, olar múgedektigi bar adamdardyń ótinishteri boıynsha aýdan ákimdikteriniń apparattarynan beriledi, - delingen basqarma jaýabynda.

Vedomstvo 2025 jyldyń 24-30 qarashasy aralyǵynda jaıaý júrginshiler ótkelderine monıtorıng júrgizilip, nátıjesinde kóptegen másele anyqtalǵanyn atap ótti. Olardyń ishinde: kótergish mehanızmderdiń isten shyǵýy, taktıldi baǵyttaýshylardyń, baspaldaq alańdarynyń belgileriniń jáne kórneki navıgatsııa elementteriniń bolmaýy.

Basqarma anyqtalǵan kemshilikterdi joıý úshin aýdan ákimdikterimen birlesip, jaıaý júrginshiler ótkelderin beıimdeý josparyn ázirlep jatyr.

– Almaty qalasynyń Kólik holdıngimen birlese otyryp, avtomattandyrylǵan qoljetimdilikke kóshý jáne magnıtti kiltter júıesinen kezeń-kezeńmen bas tartý maqsatynda «Ońaı» júıesin kótergish engizý máselesi qarastyrylyp jatyr. Pılottyq joba aıasynda Áýezov aýdanynda 5 jerústi ótkelderi qamtylǵan. Atalǵan nysandar boıynsha qabyldaý-engizý aktisi áli rásimdelmegen, sol sebepti pılottyq joba resmı túrde aıaqtalǵan joq, - dep túsindirdi basqarmadan.

Halyqty áleýmettik qorǵaý salasyndaǵy retteý jáne baqylaý komıtetiniń Almaty qalasy boıynsha departamentiniń derekterine sáıkes, megapolıste 58 387 múgedektigi bar adam tirkelgen. Olardyń ishinde 1-toby – 6 604 adam, 2-toby – 21 886 adam, 3-toby – 19 646 adam.

Eske salaıyq, buǵan deıin Almatyda jerústi ótkelderine qatysty pılottyq joba iske qosylǵanyn jazǵanbyz.