Jabaıy janýarlar popýlıatsııasy 50 jylda 70 paıyzǵa jýyq qysqardy
NUR-SULTAN. QazAqparat – Dúnıejúzilik jabaıy tabıǵat qorynyń (WWF) baıandamasyna sáıkes, jabaıy janýarlar popýlıatsııasy 1970 jyldan beri ortasha eseppen alǵanda, 68 paıyzǵa qysqarǵan, dep habarlaıdy QazAqparat VVS agenttigine silteme jasap.
WWF ǵalymdary óz baıandamasyn tiri tabıǵattyń 2020 jylǵy Jahandyq ındeksin esepteýge arnap, ekolog mamandardyń 50 jyl boıy sútqorektiler, qustar, baýyrymen jorǵalaýshylar, balyqtarǵa olardyń tirshilik etý oryndarynda baqylaý jasap, taldaý júrgizý negizinde alynǵan málimetterge súıendi.
Eń kóp shyǵyn tropıktik aımaqtarda tirkelgen: Latyn Amerıkasyn mekendeıtin jabaıy túrler popýlıatsııasy 94 paıyzǵa, Azııa-Tynyq muhıty aımaǵynda – 45 paıyzǵa, Soltústik Amerıkada – 33 paıyzǵa, Eýropa men Ortalyq Azııada – 24 paıyzǵa qysqarǵan.
London zoologııa qoǵamynyń tabıǵatty qorǵaý jónindegi dırektory Endrıý Terrı janýarlar popýlıatsııasynyń qysqarýyna adamzat qyzmeti sebep bolǵanyn aıtyp otyr.
Janýarlardyń joıylyp ketýi týraly málimetterdi Halyqaralyq tabıǵatty qorǵaý odaǵy da jınap jatyr. Ol janýarlar men ósimdikterdiń 100 myńnan astam túrine baǵalaý júrgizip, 32 myńnan astam túriniń joıylý qaýpi bar ekenin anyqtady. 2019 jyly ǵalymdardyń úkimetaralyq toby 1 mln túrdiń (janýarlardyń 500 myń túri men ósimdikterdiń 500 myń túri) joıylýǵa jaqyn degen uıǵarymǵa keldi.
