Jabaıy saýdamen qoǵam bolyp, birlese kúresý qajet - A.Imantaeva
ALMATY. 25 tamyz. QazAqparat /Ádilet Musahaev/ - Qaladaǵy ár aýdan ákimdigi Memlekettik sanıtarlyq-epıdemııalogııalyq qadaǵalaý departamentiniń aýdandyq bólimshelerimen birlesip jabaıy saýdamen kúresti jalǵastyrýda, nátıjesinde kún sanap bazar mańyndaǵy mundaı saýda túrleri joıylyp jatyr.
Bul jóninde Almaty qalasy boıynsha sanıtarlyq-epıdemııalogııalyq qadaǵalaý departamentiniń Uıymdastyrý jáne qarjy máseleleri jónindegi dırektordyń orynbasary Aıman Imantaeva jabaıy saýda oryndaryna júrgizilgen reıd barysynda aıtty.
A.Imantaeva qala turǵyndaryna jabaıy saýdamen qoǵam bolyp, birlese kúresý qajet degen úndeýin jetkizip, bul ákimdiktiń jáne taǵy basqa quzyrly oryndardyń máselesi ǵana emes, qalalyq másele ekendigin aıtyp ótti. "Eger jurtshylyq jol jıegindegi zańsyz saýdalanǵan taýarlardy almasa, ol ózdiginen joǵalyp, saýdagerler saýda jasaýǵa ruqsat bergen oryndarǵa keter edi. Qazir qala ákimdiginiń bastamasymen qalada kóptegen kópfýnktsıonaldy saýda oryndary ashylýda. Olar sonda baryp esh qysymsyz jumys istegenderi jón", -deıdi ol.
Sonymen qatar ol halyqtyń kóbi jabaıy saýda oryndarynda azyq-túlik, et taǵy basqa ónimder basqa oryndarǵa qaraǵanda arzandaý dep jatatyndyǵyn aıta kele, ondaı taýarlar esh tekseristen jáne qadaǵalaýdan ótpegendikten arzan bolýy múmkin degen paıymyn bildirdi.
A.Imantaeva sondaı-aq jabaıy saýdamen aınalysatyndarǵa bizdiń departament eshqandaı shara qoldana almaı otyr degendi aıtty. "Olardyń barlyǵy syrttan kelýshiler, sondyqtan qujattary da joq. Aıyppul salý úshin bizdiń erejege saı 12-ge jýyq qujat jınap hattama jasaý kerek bolady",-dep atap ótti ol.
