Jabaıy qusty atam dep jańa týǵan sábıdi atyp aldy - FOTO
ASTANA. QazAqparat - AQSh-taǵy Pensılvanııa shtatynda jan túrshigerlik oqıǵa oryn aldy: ańshy jabaıy qustyń ornyna jańa týǵan sábıge oq atqan. Nátıjesinde sábıdiń bir kózi kórmeı qaldy, dep habarlaıdy sheteldik BAQ.
Keshqurym ýaqytta oq daýsy shyqqan kezde búldirshin ákesiniń qolynda uıyqtap jatqan. Ańshy myltyǵynan shyqqan oq balanyń basyna kirip, kózinen bir-aq shyqqan. Balasyn uıyqtatyp jatqan áke alǵashynda ne bolǵanyn túsinbeı, abdyrap qalady. Keıin ol esin jınap, shaqalaqty dereý aýrýhanaǵa aparady.
Sábıdiń jaǵdaıy óte aýyr bolǵandyqtan dárigerler ony dereý jansaqtaý bólimine jatqyzǵan. Búldirshinniń tátesiniń aıtýynsha, balanyń kózi onyń ómirin qutqaryp qalǵan. «Iá, kózi bolmaǵanda oq onyń mıynda qalyp qoıar edi. Qazir onyń bir kózi kórmeı qaldy. Al sábıdiń ata-anasy ańshyny keshirdi», - dedi ol.
Polıtseılerdiń aıtýynsha, oq Aıverson otbasynyń jekemenshik jerinde atylǵan. Alaıda olar ańshyǵa eshqandaı shara qoldanbaıdy, óıtkeni ańshynyń bul aımaqta júrýge bolatyn ruqsat qaǵazy bar eken. Sondyqtan bul qaıǵyly jaǵdaı retinde ǵana tirkeldi.
