Jabaıy ań-qustarǵa joıylý qaýpi tónip tur - O.Óksikbaev
ASTANA. QazAqparat - Elimizdegi jabaıy qustar men ańdarǵa joıylý qaýpi tónip tur. Búgin Parlament Májilisiniń jalpy otyrysynda depýtat Omarhan Óksikbaev osyndaı másele kóterdi.
Depýtat «Qyzyl kitapqa» engizilgen janýarlar sanynyń kóbeıgenine qaramastan, elimizde ań jáne qus aýlaý sharýashylyǵy da tez damyp keletinin alǵa tartady. Onyń sózine qaraǵanda, jalǵa berilgen ań sharýashylyqtary faýnany qaıta jańǵyrtýmen aınalyspaıdy, olar tek paıda tabý máselesin kózdeıdi. «Faýnany qorǵaýǵa ýákiletti organdardyń qajetti deńgeıde baqylaý júrgizýge qaýqary joq. Sebebi, tehnıkalyq jabdyqtalýy tómen, ári úlken aýmaqty baqylaýǵa shtat qyzmetshileriniń sany jetkiliksiz. Sonymen birge ań aýlaý qarý-jaraqtarynyń sheksiz kólemde satylýy biz maqtanysh etetin janýarlar áleminiń tolyǵymen joıylýyna sebep bolyp otyr», - deıdi depýtat Omarhan Óksikbaev. Budan bólek, májilismen ýákiletti organdar jabaıy janýarlardyń mıgratsııalyq protsesi men olardyń sanyn zertteýdi toqtatqanyn, bul faýnanyń tez arada joıylýyna yqpal etip otyrǵanyn da jetkizdi. «Osyǵan oraı, jabaıy janýarlar álemin zertteýmen aınalysatyn ınstıtýttarǵa qosymsha qarjy bólý qajet, al ań sharýashylyqtaryna ruqsat berý quqyǵyn shekteý kerek. Ekinshiden, elimizde faýnany qaıta jańǵyrtý jáne janýarlar mıgratsııasyn azaıtý maqsatynda kóktem mezgilinde ań men qustyń barlyq túrin aýlaýǵa qatań tyıym salýymyz kerek. Sosyn joǵalýǵa aınalǵan ańnyń tóldeıtin, qustyń balapandaıtyn jerlerin zerttep, sol jerlerdi qorǵalatyn ulttyq tabıǵı qoryqtaryna aınaldyrý máselesin qolǵa alý da mańyzdy», - dedi depýtat.
